Rafiq Əliyev: “İstilik təchizatı obyektlərinin mövsümə hazırlanması başa çatıb”
 
 
Oktyabrın son günləridir. Əvvəlki illərin müvafiq dövrü ilə müqayisədə hava daha soyuq keçir. Bu səbəbdən də əhalini ən çox maraqlandıran suallardan biri hava durumunun daha da pisləşəcəyi təqdirdə kommunal xidmət sahəsində yarana biləcək problemlərdir. Maraqlıdır, dövlət qurumları qış mövsümünə necə hazırlaşıb?
 
“Azəriqaz” İstehsalat Birliyinin ictimaiyyətlə əlaqələr şöbəsinin rəisi Eldəniz Vəliyev Sozcu.info-a bildirdi ki, qurum ilin bütün fəsillərində payız-qış aylarına hazırlıq prosesi ilə məşğul olur: “İlin bütün fəsillərində boru xətlərinin yenilənməsi, korroziyaya uğrayan boruların yenisi ilə, yeraltı xətlərin isə yerüstü xətlərlə əvəz olunması, rənglənməsi, saz vəziyyətə gətirilməsi işləri görülür. Soyuq hava şəraitində daha davamlı, təhlükəsiz mavi yanacağın verilməsini təmin etmək üçün ”Azəriqaz" lazımi tədbirləri həyata keçirir. Qış aylarına hazırlıq prosesini xeyli müddətdir bitirmişik. Qazanxanaların mavi yanacaqla təmin olunmasından tutmuş, abonentlərin mavi yanacaqla təmin olunmasına qədər hər hansı problemimiz yoxdur.

Eldəniz Vəliyev: ““Azəriqaz” qışa tam hazırdır”
Ara-sıra qazın təzyiqi ilə bağlı müşahidə olunan problemlər də “Azəriqaz” İstehsalat Birliyinin əməkdaşları tərəfindən dərhal aradan qaldırılır. Bu, istər abonentlərin müraciəti əsasında, istərsə də əməkdaşlarımızın əraziyə keçirdiyi baxış zamanı aşkarlandıqda həyata keçirilir. Buna daim nəzarət var. Ümumiyyətlə, “Azəriqaz” İstehsalat Birliyi qışa tam hazırdır".

Vaqif Aydınoğlu: “Təxirəsalınmaz tədbirlər hələ yayda həyata keçirilib”
“Azərişıq” ASC-nin mətbuat xidmətinin rəhbəri Vaqif Aydınoğlu  “Yeni Müsavat”ın sorğusuna cavabında bildirdi ki, qış mövsümündə istehlakçıları keyfiyyətli, dayanıqlı və fasiləsiz elektrik enerjisi ilə təmin etmək üçün respublika ərazisində genişmiqyaslı  tədbirlər həyat keçirilib: “Yenidənqurma və bərpa işləri müasir metodlarla aparıldığından, bu tədbirlər bütün fəsillər üçün keçərlidir. Qış mövsümü üçün yarımstansiyaların, paylayıcı qurğuların, kabel və hava elektrik verilişi xətlərinin normal və qəzasız iş rejiminin yaradılması məqsədilə ciddi və təxirəsalınmaz tədbirlər hələ yay aylarında həyata keçirilib. ”Azərişıq" ASC müasir elektrik enerjisi təchizatı sistemlərini elə formalaşdırır ki, təbiət hadisələri, kənar müdaxilə faktorları istehlakçıların fasiləsiz enerji təminatına daha az təsir etsin. Abonentlərimizin hər hansı bir sualı yaranarsa, dərhal “199" qısa nömrəsi ilə Çağrı Mərkəzinə müraciət edə bilərlər. 24 saat fasiləsiz xidmət göstərən ”Qəza Xidməti"nin operativ müdaxiləsi nəticəsində baş verən nasazlıq xarakterinə görə qısa vaxt ərzində aradan qaldırılacaq. Paylayıcı şəbəkələrin yenilənməsi, gücləndirilməsi və müasirləşdirilməsi prioritet hədəflər olmaqla yanaşı, elektrik enerjisi itkilərinin azaldılması da xüsusi diqqətdə saxlanılır".

Rafiq Əliyev: “İstilik təchizatı obyektlərinin mövsümə hazırlanması başa çatıb”
Mövzu ilə bağlı “Azəristiliktəchizat” ASC-nin Abonent və Müştəri Xidmətlərinin rəisi Rafiq Əliyevlə də əlaqə saxladıq. O bildirdi ki, tədbirlər planına uyğun olaraq, istilik təchizatı obyektlərinin mövsümə hazırlanması ilə bağlı tədbirlərin icrası başa çatdırılıb: “Respublikanın dağ və dağətəyi rayonlarında  noyabrın  1-dən, digər ərazilərdə, o cümlədən Bakı şəhərində 15 noyabr tarixindən istiliyin verilməsinə başlanacaq. Bununla əlaqədar olaraq, quruma məxsus 554 qazanxana istismar edilməklə 3871 yaşayış binası, o cümlədən 184 minə yaxın mənzil, 281 məktəb, 160 uşaq bağçası, 161 səhiyyə müəssisəsi və 1980 digər sosial və təsərrüfat obyektlərinin istiliklə təmin edilməsi nəzərdə tutulur. Bütün qazanxana və istilik məntəqələrində nasoslar, elektrik mühərrikləri təmir olunub, qazanlar və istilik mübadilə aparatları mexaniki və kimyəvi üsulla təmizlənib, nəzarət ölçü cihazlarının, avtomatika və elektrik avadanlıqlarının dəyişdirilməsi və sazlanması həyata keçirilib, magistral və məhəllədaxili istilik xətləri təzyiqlə yoxlanılaraq sınaqdan keçirilib və qış mövsümündə problem yarada biləcək istilik xətləri dəyişdirilərək yenisi ilə əvəz olunub, qazanxanalar ehtiyat qazan və nasoslarla təmin edilib. Tədbirlər planına əsasən, 554 qazanxana və 90 istilik məntəqəsi kompleks yoxlanılıb,531 odluq təmir olunub, 931 ədəd qazan aqreqatı əsaslı və cari təmir olunub. İstilik təchizatı sistemində ən vacib sahələrdən birinin magistral istilik xətləri olduğu nəzərə alınaraq 2021-2022-ci illər istilik mövsümünə hazırlıq tədbirləri çərçivəsində bu sahədə də əhəmiyyətli işlər görülüb. Cəmiyyətə məxsus 230 qazanxana və istilik məntəqəsində istilik parametrlərinə məsafədən nəzarət sistemi quraşdırılıb ki, bu da Bakı şəhəri və respublikanın regionlarında qazanxana və istilik məntəqələrində texnoloji rejim parametrlərinə uzaqdan nəzarət etməklə qəbul edilən qərarların operativliyinin artırılmasına və yanacaq-enerji resurslarına qənaət etməyə imkan verir. ”Azəristiliktəchizat" ASC tərəfindən istehsal edilmiş isti suyun, istehsal edilmiş istiliyin satışı, abonent məlumatlarının dəyişdirilməsi, abonentə aid ünvan məlumatlarının dəqiqləşdirilməsi, borcun olmaması (və ya olması) haqqında sənədin verilməsi, əhali istehlakçı qrupuna aid olan istehlakçının qeydiyyata alınması, isti su sayğaclarının quraşdırılması üçün müraciət, istilik enerjisi təchizatı sisteminə qoşulmalar üçün texniki şərtlərin verilməsi, qeyri-əhali istehlakçı qrupuna aid olan istehlakçının qeydiyyata alınması ilə bağlı xidmətlər “ASAN Kommunal” mərkəzləri vasitəsilə həyata keçirilir.
Payız-qış mövsümünün yaxınlaşması ilə əlaqədar istehlakçılar tərəfindən də yaşayış binaları, mənzillər və sosial obyektlərdə enerjiqoruyucu tədbirlər görülməli, binaların ümumi istifadədə olunan hissələrində, pilləkən qəfəslərində və digər yerlərdə qapı və pəncərələrdən istilik itkilərinin qarşısının alınması üçün tədbirlər görülməli, binadaxili və mənzildaxili istilik sistemləri təkrar yoxlanılmalı, istilik sistemlərində yaranmış su sızmaları və axıntılar dərhal aradan qaldırılmalı, əvvəlki mövsümdə istilikvermə qabiliyyəti zəif olan qızdırıcı cihazlar yuyularaq təmizlənməli və ya yenisi ilə əvəz olunmalı, köhnə polad borulardan olan dik dayaqlarda tutulma halları müşahidə olunduğu zaman həmin dik dayaqlar yenisi ilə əvəz olunmalıdır".