Rusiya Dövlət Dumasına 18 sentyabrda keçirilən seçkilərdə iqtidardakı "Vahid Rusiya” Partiyası və Kommunist Partiyasına uduzaraq üçüncü yer tutan Liberal-Demokratik Partiyasının lideri Vladimir Jirinovski hakimiyyətə qarşı sərt ittihamlar səsləndirib.

 

Jirinovski seçkilərin nəticələri ilə bağlı çıxışında hakimiyyəti seçkiləri saxtalaşdırmaqda ittiham edib.

 

O, hakimiyyətdən qanuni mandatları onlara qaytarmağı tələb edib.

 

"Rusiyanıın liderləri, siz nə edirsiniz? Bütün xalq sizə qarğış edir. Partiyanın üzvü ("Vahid Rusiya”) olduğunu deməyə utanırsınız. Biz sizin üçün bataqlıq yaradacağıq. Bu, başqa cür bataqlıq olacaq. Siz şəffaf seçkilər keçirməyə qadir deyilsiniz. Gəlin, növbədənkənar parlament və prezident seçkiləri təyin edək. Bizim deputatlarımızın əvəzinə öz deputatlarınıza mandat vermisiniz, bizim müşahidəçilərimizin əvəzinə öz müşahidəçilərinizi yerləşdirmisiniz və saxta protokollar tərtib etmişiniz”, - deyən partiya lideri əlindəki seçki protokolunu cırır.  

 

Jirinovski daha sonra "Vahid Rusiya”ya və sizin hakimiyyətinizə ayıb olsun” deyir. Siyasətçi seçkilərin nəticələrinin heç kim tərəfindən tanınmadığını bildirir.

 

"Rədd olun! Alçaqlar, yaramazlar! Sizi görməyə gözüm yoxdur!” – partiya sədri çıxışını tamamlayır.(Publika.az)