Vətən savaşı davam edir, indi də beynəlxalq platformada Azərbaycanın üzərinə hücum edilir. Fransa Senatı fitnəkar bəyanat verib. Fransa XİN bəyanat verdi, dedi “DQR”i tanımır, həmçinin bu bəyanatı Fransa hökumətinin rəsmi mövqeyi sayılmadığı vurğulanır. Rəsmi Bakını bu qane edirmi? Bundan sonra necə olacaq? Fransanın Minsk Qrupunda qalmasına etiraz ediləcəkmi?
Dağlıq Qarabağdakı qanunsuz silahlı dəstələr necə və nə vaxt tərksilah ediləcək? Aralıq müddətdə Xankəndi ermənilərinə tutaq ki, polis qüvvələri saxlamağa icazə verilə bilərmmi? Məsələ ondadır ki, erməni tərəfi hələ də “Arsaxın özünü müdafiə ordusu”ndan dəm vurur. Sanki əmindirlər ki, həmişə “ordu” saxlayacaqlar. Təəssüf ki, imzalanan 3-tərəfli sazişdə separatçıların tərksilah məsələsi ilə bağlı heç nə deyilmir. Haqqında cinayət işi açıb İnterpola verdiyimiz separatçı başı Araik isə sərbəst şəkildə Moskvaya gedir, orada hansısa danışıqlar aparır. Bir azdan yəqin ki, Fransada peyda olacaq, xüsusən də Senatın məlum qətnaməsindən sonra. Bütün bu məsələlər necə nizamlanacaq, separatçılar tərksilah edilib zərərsizləşdiriləcəkmi, cinayətkarlar həbsə salınacaqmı?
Azərbaycan hüquq mühafizə orqanları Arayiki Moskvada həbs edə bilərmi?
Ermənilər indi də Putinin sözlərindən həvəsləniblər. Paşinyanın opponentləri deyir ki, müharibə başlayan kimi Ermənistan Dağlıq Qarabağdakı oyuncaq qurumun “müstəqilliyi”ni tanımalıydı. Xatırladaq ki, Putin Rusiyanın müharibəyə müdaxilə etməməsinin səbəblərindən danışarkən belə bir fikir söylətmişdi: “Dağlıq Qarabağın müstəqilliyini Ermənistanın özü belə tanımadığı üçün Dağlıq Qarabağ və ətrafındakı 7 rayon beynəlxalq hüquqa görə, Azərbaycanın ayrılmaz tərkib hissəsi idi və indi də elədir. Biz müdaxilə edə bilməzdik”. Sual yaranır: guya Ermənistan qanunsuz rejimi tanısaydı, nə dəyişəcəkdi ki? Beynəlxalq hüquq bizim tərəfimizdə olmayacaq, Rusiya da müharibəyə müdaxilə imkanı əldə edəcəkdi?
Yoxsa təcrübəli Putin bunu sadəcə, Rusiyanı qınaqdan çıxarda biləcək arqument kimi səsləndirir?
Və Naxçıvan dəhlizi... Anlaşmaya görə, Naxçıvana dəhlizin işğaldan azad edilən Azərbaycan torpaqlarının hansı qismindən çəkiləcəyi məlum deyil. Bu səbəblə, quru və ya dəmir yolu variantlarının işlək ola bilməsi üçün Ermənistan və Rusiya tərəfinin bunu qəbul etməsi xüsusi qeyd edilməlidir. Üstəlik, hansı metodla və hansı marşurutla çəkilməsindən asılı olmayaraq, dəhlizin mövcud Ermənistan torpaqlarından keçməli olması və rus hərbi qüvvələrinin təhlükəsizliyi təmin edəcək təminatçı kimi çıxış etməsi qeyri-müəyyənliyi və təhlükəni özü ilə birlikdə gətirir.
Eyni zamanda anlaşmanın digər qisimlərindəki nailiyyətlər, – burada ən önəmli olanı Dağlıq Qarabağın aqibətidir, – “Naxçıvan dəhlizi”lə bağlı müddəanın həyata keçirilməsi işini poza bilər. Yekunlaşdırsaq, bu vacib dəhliz Rusiyanın və Ermənistanın cığallığı ilə təxirə düşə bilərmi? Belə təhlükə varmı?
Ermənistanda müxalifətin, cəmiyyətin, o cümlədən övladları hələ də tapılmayan valideynlərin etirazlarına rəğmən, parlament bu gün ölkədə hərbi vəziyyət rejimini ləğv etmədi. Paşinyan bununla nə demək istəyir, hərbi rejimi saxlamaq onun nəyinə gərəkdir? Yoxsa hələ də müharibə xofu ilə yaşayır?
Bu və gündəmdəki digər məsələlər  deputat Razi Nurullayevlə müzakirə edilib.
Verilişə aşağıdakı linklər vasitəsilə baxa bilərsiniz:
Youtube səhifəmizin ünvanı:
https://www.youtube.com/user/TVmusavat

Facebook səhifəmizin ünvanı:
https://www.facebook.com/NewMusavat/