“Ermənistan hakimiyyəti iki həftə əvvəl ictimai tələb olmadığından erkən seçki məsələsinin qapandığını elan etsə də, son hadisələrdən sonra yenidən bu məsələyə qayıdıb və hərtərəfli şəkildə seçkilərə hazırlaşır”.

Sozcu.info -nun məlumatına görə, bu barədə “Qraparak” qəzeti yazıb.

Nəşrin özünün etibarlı qaynağa istinadla irəli sürdüyü iddiaya əsasən, hökumət bu günlərdə dövriyyəyə başqa bir layihə buraxıb: “Hökumətdəki mənbələrimiz bildirir ki, bu layihə seçkiöncəsi bir sıra addımlar sırasına daxil edilə bilər. Qanun layihəsinə əsasən, hərbi vəziyyət rejimində (müharibə bitsə də, hələ ləğv edilməyib – red.) səlahiyyət müddəti bitmiş bələdiyyə sədrləri və icma rəhbərlərinin işdən azad olunmasını, onların yerinə müvəqqəti şəxslərin təyin edilməsi və bələdiyyə məclislərinin müddətinin seçkilərə qədər uzadılması təklif olunur”.

Hərbi vəziyyət rejimində heç bir seçkinin keçirilmədiyini xatırladan qəzet ardınca ehtimal edir ki, müvəqqəti icma rəhbərləri institutu tətbiq eləməklə hakimiyyət əslində, erkən parlament seçkilərinə hazırlaşır, çünki hazırkı icma rəhbərləri seçkiləri zamanı arzuolunmaz şəxslər qismində görünə bilər.

“Keçmiş hakimiyyəti icma liderlərini respublikaçılaşdırmaqda ittiham edən iqtidar (eks-prezident Serj Sərkisyanın rəhbəri olduğu Respublikaçılar Partiyası nəzərdə tutulur – red.) yerli özünüidarə orqanlarını öz tərəfinə çəkmədən seçkilərdə qalib gəlməyin mümkün olmadığını yaxşı başa düşür”, - deyə nəşr qeyd edib.


Öz növbəsində tanınmış erməni politoloq Aleksandr İsgəndəryan hesab edir ki, Nikol Paşinyan ədalətli seçkilərdə çox böyük bir ehtimalla qalib gələcək, “çünki Serj Sarkisyan ona gözəl bir konstitusiya və Seçki Məcəlləsi qoyub gedib”. Lakin onun qənaəticə, ölkənin xilası erkən seçkilərə bağlı deyil.

Onun sözlərinə görə, Ermənistandakı mövcud vəziyyətdə apaydın olan məsələ - işləmək, institutlaşmaya getmək, idarəetməni mərkəzləşdirməkdir: “Sədaqətlilik və səriştə prinsiplərinə önəm verməyi dayandırmaq, mükəmməl parlament sistemi formalaşdırmaq, siyasi partiyaları institutlaşdırmaq lazımdır. Həmçinin, insanların siyasətə nüfuz etməsi önündə torlar yaratmaq, ciddi şəkildə menecmentə başlamaq, sadə dillə desək, ölkəni təzədən “yığmaq” lazımdır. Ölkəni qurmaq və subyektivlik qazanmaq lazımdır – o subyektivlik ki, böyük ölçüdə itirilib. Əgər ayrı cür olsa, başqaları hakimiyyətə gəlsə, çətin ki, onlar çox güclü, konsolidasiya edilmiş bir iqtidarı təmsil etsinlər. Ən azından ilk aylar və ya illər bu mümkün olmayacaq”.
Sözünə davam edən politoloq deyib: “Nə olacaq? Hər şeydən göründüyü kimi, qarşıdurma olacaq, mitinqlər və müxalifətin fəallığı davam edəcək. Öz növbəsində iqtidar hakimiyyəti qorumaq üçün erkən seçkilərlə bağlı danışıqlar aparır. Müvafiq olaraq, belə bir siyasi çıxılmaz vəziyyət formalaşıb və bu vəziyyətdən yaxın həftələrdə qurtuluş yolu görmürəm”.

İsgəndəryanın fikrincə, seçkilər heç bir şeyi dəyişdirə bilməz, “Vəziyyəti dəyişdirmələri üçün ən azından ölkədə siyasi partiyalar olmalıdır – hansı ki, yoxdur. Mövcud strukturlar isə partiya anlayışına uyğun gəlmir. Ölkəni dirçəltmək üçün onu təzədən inşa eləmək lazımdır, dəyişikliklərə aparan seçkilər isə bu inşanın səbəbi yox, nəticəsi ola bilər. Və çox şey etmək lazımdır. Qurmaq, yaratmaq lazımdır, nəinki öncə bir şeylər olsun, sonra qabağa gedək düşüncəsi ilə hərəkət eləmək. Önümüzdə iqtisadi böhran var. Yalnızca seçkilərlə bir şeylər etmək mümkün deyil, qarşıdakı uzun illər üçün bizi ağır, ciddi işlər gözləyir”, - deyə o sonda vurğulayıb.

Ermənistanı təzədən “yığmaq”. Yaxşı ideyadır. Ancaq bir sual var? Təzədən “yığılmış” Ermənistan nə cür bir ölkə olacaq görəsən? 27 sentyabr 2020-ci ilədək olan aqressiv, öz qonşuların qarşı əsassız ərazi iddiası və revanşist hisslərlə yaşayan, daim müharibə mənbəyi olan ölkə, yoxsa qonşular kimi, beynəlxalq hüquqa sayğılı və sülhsevər ölkə?

Sualın cavabını yəqin ki, önümüzdəki həftələrdə, yaxud Ermənistandakı daxili siyasi situasiyaya tam aydınlıq gələndə biləcəyik...