Bakı şəhər İcra Hakimiyyətinin keçmiş aparat rəhbəri, bir müddət icra başçısının müavini səlahiyyətlərini icra etmiş Rasim Quliyevin növbəti məhkəməsi baş tutub.
Sozcu.info xəbər verir ki, Rasim Quliyevin işi Bakı Ağır Cinayətlər Məhkəməsində hakim Faiq Qəniyevin sədrliyi ilə araşdırılır.
Bu gün baş tutan məhkəmə prosesində "FF" MTK-nın rəhbəri, əsas şahid Tamilla İbrahimova ifadə verməyə davam edib.
O bildirib ki, Bakı şəhər İcra Hakimiyyətində 2013-2015-ci illərdə 3 sənəd təsdiqlədib: "Həmin sənədlərə görə, bu ünvanlarda tikinti aparmağa icazə almışam. Mən indi 3 ünvandan birini tikə bilmərəm? Hacıbala Abutalıbov düz işləməyib. Əgər düz işləsəydi, heç kimə tikinti aparmağa icazə verməzdi. İndi də Eldar Əzizovun imzasını Rasim Quliyevin imzasından fərqləndirirlər. Nədir fərq?
Mən Hacıbala Abutalıbovun yanında olanda soruşdum ki, Rasim Quliyev kimdir? Onun imzasına görə mənim işimi niyə saxlayıblar? O da dedi ki, ola bilməz. Bildirdi ki, Rauf Pənahovdan sonra mən icazə vermişəm ki, öz nəzarətim altında sənədlərə imza atsın".
Milyonlarla manat zərər gördüyünü deyən xanım sahibkar narazılığını bildirib: "Mənə bir nəfər desin ki, bu sənəd səhvdir, mən də hər şeyi atıram kənara. İndi mən qalmışam çarəsiz. Axırıncı dəfə Hacıbala Abutalıbovun yanında olanda mənə dedi ki, edə bilmirəm, sənədi Eldar Əzizov ləğv edib. Şəhərsalma və Memarlıq Baş İdarəsi də dedi ki, mənlik deyil. Mən Eldar Əzizovu məhkəməyə verdim. Tikinti Şəhərsalma və Arxitektura Komitəsi gəldi məhkəmədə dedi ki, başınızı baltanın altına qoymayın. İndi hamısı qorxurlar. 8 ildir telefonumu aça bilmirəm. Eldar Əzizovla məhkəməm isə baxılmamış saxlanılıb".
Prosesdə çıxış edən Bakı Şəhər İcra Hakimiyyətinin hüquqşünası bildirib ki, 2018-ci ildə Şəhərsalma və Arxitektura İdarəsi BŞİH-dən alınıb. Rasim Quliyev də ondan sonra tikintiyə sərəncam imzalayıb.
Rasim Quliyev isə bildirib ki, həmin sərəncamı o hazırlamayıb: "Sərəncam mənə qovluqda gətirilib. 2015-ci ildə "FF" firmasına tikintiyə icazə barədə sərəncam verilib. O vaxt həmin sərəncamı mən imzalamamışam. Mən bilmirəm mənim sərəncamıma nə ehtiyac var idi?"
Hüquqşünasın "Əgər ehtiyac yox idisə niyə imzalayırdın?"sualına isə Rasim Quliyev cavab olaraq bildirib ki, sərəncam hazır vəziyyətdə imza üçün ona təqdim edilib: "Mənə təqdim ediblər, mən də imzalamışam. Mən Tikinti və Arxitektura İdarəsinin əməkdaşlarına etimad göstərmişəm".
Hakim bildirib ki, 2017-ci ildə Tikinti Məcəlləsinə dəyişiklik edilib: "Yeni məcəlləyə görə, tikintinin başlanması üçün sərəncam verilməlidir. Bunun isə "FF" firmasına heç bir aidiyyəti yoxdur. Çünki "FF" şirkəti 2013-cü ildə tikinti aparmaq üçün sərəncam alıb".
Şirkət rəhbəri Tamilla İbrahimova bildirib ki, Rasim Quliyevin sərəncamı tikinti üçün əhəmiyyətsiz olub: "Mənə kimin imza atmasının nə dəxli var? Ya Hacıbala çəksin, ya Eldar Əzizov, ya da Rasim Quliyev. Mənə sənəd lazımdı ki, mən də həmin sənədləri 2015-ci ildə almışam. Rasim Quliyevin sərəncamına heç bir ehtiyacım olmayıb, bu gün də yoxdur. Bakı Şəhər İcra Hakimiyyətinə 2011-də müraciət etmişəm, 2012-də sərəncam almışam. Akif Abdullayevin işçisi Maarif adlı şəxs də sərəncamı gətirib verib mənə. Sərəncam verilib ki, həmin ərazidə 4 bloklu bina tikilsin. Həmin vaxtdan sakinlər də küçələrdə qalıb. Yazıq deyilmi o sakinlər? Mən sərəncamı, tikinti nişanını alanda Rasim Quliyevi tanımamışam".
Şirkət rəhbəri bildirib ki, sərəncama görə, bina sakinlərini köçürməyi Bakı şəhər İcra Hakimiyyəti tapşırıq verib: "Sərəncamda Mirzə İbrahimov və Dilarə Əliyeva küçələrindəki vətəndaşların köçürülməsi və binaların sökülməsi göstərilib. Amma indi imkan vermirlər. Mənə 2013-cü ildə verilən sərəncamda göstərilir ki, hər iki məhəllədə geoloji kəşfiyyat və tikinti aparılmasına icazə verilib. Tikinti aparmaq üçün bütün aidiyyəti qurumlardan icazə almışam. 30-dan artıq təşkilatdan rəy almışam".

İttihamda yazılır ki, R.Quliyev Nəsimi rayonu, Dilarə Əliyeva küçəsində yerləşən binanın, həmçinin yerli əhəmiyyətli mədəniyyət abidəsi kimi dövlət tərəfindən mühafizə olunan yaşayış evinin sökülməsi, yerində yeni binaların tikintisi üçün “FF-2011” şirkətinə qanunsuz icazə verib.
İttihama əsasən, Rasim Quliyev Nəsimi rayonu ərazisində ofis və yaşayış binalarının tikilməsinə dair 31 may 2018-ci il tarixli sərəncamı icra başçısının müavini vəzifəsini icra etdiyi vaxt imzalayıb. Həmin ərazidə 1893-cü ildə inşa edilmiş, yerli əhəmiyyətli tarix və mədəniyyət abidəsi kimi dövlət tərəfindən mühafizə olunan yaşayış evinin olması nəzərə alınmayıb.
Qeyd edək ki, Rasim Quliyevin yaxınları bildirir ki, həmin sərəncam Hacıbala Abutalıbovun zamanında imzalanıb.