Bakıda evində tanışını öldürməkdə təqsirli bilinən Qax rayon sakini, 1980-ci il təvəllüdlü Rəcəb Məmmədovun cinayət işi üzrə məhkəmə prosesi başa çatıb.

Sozcu.info -nun əldə etdiyi məlumata görə, Rəcəb Məmməov tanışları – Fərhad Mehdiyev, Kristina Mıts, Mixail Vdovin və Aleksandr Karuxin ilə birlikdə tibbi spirti suya qatıb, spirtli içki düzəldiblər.

Onlar əvvəlcə Suraxanı rayonu, Əmircan qəsəbəsi, Malik Mustafayev küçəsi 20 nömrəli binanın qarşısında yerləşən besedkada, daha sonra isə həmin binanın 24 nömrəli mənzilində içki məclisi təşkil edib, birlikdə spirtli içki qəbul ediblər.

Həmin gün saat 21.00-da içki məclisinin bitməsinə görə Kristina Mıts, Mixail Vdovin və Aleksandr Karuxinin oradan çıxaraq evlərinə gediblər.

Həmin vaxt Rəcəb Məmmədov orta dərəcəli sərxoşluq vəziyyətində olan və evin qonaq otağındakı stulda yatmış vəziyyətdə olan Fərhad Mehdiyevi təxminən saat 23.00-da yuxudan oyadaraq, onun da evinə getməsini tələb edib.

Fərhad Mehdiyev isə Rəcəb Məmmədovdan borc pul istəyib, pulu olmadığı təqdirdə telefonunu sataraq ona lazım olan pulu verməsini bildirib. O, habelə Rəcəb Məmmədovun ünvanına nalayiq ifadələr işlədib.

Bunları bəhanə edən Rəcəb Məmmədov Fərhad Mehdiyevi öldürmək qərarına gəlib. O, bu niyyətini həyata keçirmək üçün mətbəx bıçağını götürüb və həmin bıçaqla Fərhad Mehdiyevin qəsdən boğaz, sinə və bədənin digər nahiyələrinə zərbələr yetirib.

Fərhad Mehdiyev aldığı zərbələrdən hadisə yerində ölüb. Suraxanı rayon Polis İdarəsinin 31-ci polis bölməsi əməkdaşlarının keçirdikləri əməliyyat-axtarış tədbirləri nəticəsində Rəcəb Məmmədov tutulub.

İstintaq orqanı tərəfindən Rəcəb Məmmədovun barəsində Cinayət Məcəlləsinin 120.2.2-ci (xuliqanlıq niyyəti ilə adam öldürmə), 120.2.4-cü (xüsusi amansızlıqla və ya ümumi təhlükəli üsulla adam öldürmə) və 120.2.9-cu (təqsirkar şəxs üçün aşkar surətdə köməksiz vəziyyətdə olan adamı öldürmə, habelə adam oğurluğu və ya girov götürülməsi ilə bağlı adam öldürmə) maddələri ilə ittiham elan edilib.

Bakı Ağır Cinayətlər Məhkəməsinin hökmü ilə Rəcəb Məmmədov 17 il müddətinə azadlıqdan məhrum edilib. Onun cəzasını ciddi rejimli cəzaçəkmə müəssisəsində çəkməsi hökm edilib.

Hökmdən narazı qalan Rəcəb Məmmədov apelyasiya şikayəti verib. O, günahsız olduğunu, barəsində bəraət hökmünün çıxarılmasını istəyib.

Bakı Apelyasiya Məhkəməsinin qərarı ilə Rəcəb Məmmədovun şikayəti qismən təmin edilib. Onun cəzası 14 ilə endirilib.

Bu qərardan narazı qalan Rəcəb Məmmədov kasasiya şikayəti verib. O, kasasiya şikayətində günahsız olduğunu qeyd edib.

Rəcəb Məmmədovun kasasiya şikayəti araşdırılması üçün Ali Məhkəməyə göndərilib. Hakim Tahir Kazımovun sədrliyi ilə baş tutan iclasda kasasiya şikayətinin dəlilləri araşdırılıb, sonda qərar elan edilib.

Qərara görə, Rəcəb Məmmədovun kasasiya şikayəti təmin olunmayıb.