Dünyanın yeddi inkişaf etmiş ölkəsindən biri, Ümumdaxili Məhsulunun həcminə görə planetin on böyük iqtisadiyyata malik ölkəsi olan Birləşmiş Krallığın baş naziri Boris Consonun başı dərddədir. Səbəb isə Boris Consonun baş nazir olduqdan sonra yaşamaq üçün köçdüyü hökumət evinin təmir xərclərinin bir hissəsini lideri olduğu Mühafizəkarlar Partiyasına ödənilən ianələrin hesabına ödəyib. Birləşmiş Krallıqda partiyaların maliyyələşməsinə də nəzarəti həyata keçirən Seçki Komissiyası araşdırmaya başlayıb. Bu qalmaqal Boris Consonun istefasına gətirib çıxarmasa da, siyasi fəaliyyətinə ciddi zərər vuracağı şübhəsizdir. Müxalifət parlamentdə Boris Consonu sərt tənqid edərək, baş naziri qaydaları pozmaqda ittiham edib. Onu da qeyd etmək yerinə düşər ki, Boris Conson bu pulları şəxsi mənzilinin deyil, hökumət başçısının yaşaması nəzərdə tutulan və Downing Street-də yerləşən hökumət evinin təmirinə sərf edib. Növbəti seçkidə Mühafizəkar Partiyası seçkini uduzsa, Boris Consonun təmir etdiyi evin sakini müxalifətin indiki lideri olacaq. Ancaq buna baxmayaraq müxalifət Boris Consonu sərt tənqid edir.  

Əgər Boris Conson Şəmkir Rayon İcra Hakimiyyətinin başçısı Alimpaşa Məmədovun əməllərinin bir hissəsini törətmiş olsaydı, yəqin ki başçılıq etdiyi hökumət istefaya gedər və Mühafizəkarlar Partiyasının çoxluğq təşkil etdiyi parlament buraxılar, vaxtından əvvəl seçkilər keçiriərdi. 

Dövlət Təhlükəsizliyi Xidməti (DTX) Şəmkir Rayon İcra Hakimiyyətinin başçısı Alimpaşa Məmədovun həbs edilməsi ilə bağlı yaydığı rəsmi məlumat görə, icra başçısı Şəmkir rayonu Çinarlı bələdiyyəsi tərəfindən təsis edilmiş, mülkiyyətində 2 milyon 844 min manat dəyərində əmlakı olan “Çinarlı Qəsəbə” MMC-nin bütün paylarını oğlu Adilzadə Adil Alimpaşa oğlu və tabeçiliyində fəaliyyət göstərən digər şəxslərə məxsus “Şəmkir Səbət Ticarət Mərkəzi” MMC-yə cəmi 40 manata, Şəmkir şəhər Bələdiyyəsi tərəfindən təsis edilmiş, mülkiyyətində 967 min manat dəyərində qida məhsulları istehsal zavodu olan “Abad Şəmkir” MMC-nin bütün paylarını oğlu Adil Adilzadəyə cəmi 180 manata satılmasını təmin edib. “Bundan başqa Alimpaşa Məmmədovun Şəmkir rayon ərazisində abadlıq işlərinin görülməsi ilə bağlı “Ağstafasutikinti” MMC-nin hesabına köçürülmüş 218 min manat külli miqdarda pul vəsaitini nağdlaşdıraraq təkrar mənimsəmə yolu ilə ələ keçirməsinə, Şəmkir rayonu ərazisində dövlət büdcəsindən ayrılan vəsaitlər hesabına tikinti və abadlıq işləri, əsaslı və cari təmir, habelə yolların təmir edilməsi ilə bağlı işləri yerinə yetirən ayrı-ayrı şəxslərdən ümumilikdə 382 min manat, rayon ərazisində sahibkarlıq və yaşayış təyinatlı tikinti işlərinin aparılması ilə bağlı ayrı-ayrı vətəndaşlardan ümumilikdə 217 min manat vəsaiti tabeçiliyində olan şəxslər vasitəsi ilə rüşvət qismində istəyərək almasına əsaslı şübhələr müəyyən edilib”.

Bunlarla da kifayətlənməyən Alimpaşa Məmmədov həmçinin rayon icra hakimiyyəti başçısının ərazi icra nümayəndələri və digər yerli dövlət təsisatlarının vəzifəli şəxslərindən müxtəlif adlar altında 3 mindən - 10 min manat qədər məbləğində pul vəsaitləri tələb edərək alıb. Mənimsəmə və rüşvət alma yolu ilə pul vəsaitlərinin əldə edilməsinin həqiqi mənbəyini gizlətmək məqsədi ilə 832 min manat vəsaiti oğlu Adil Adilzadənin adına təsis etdiyi “Az Forel” MMC-nin Şəmkir rayonunda yerləşən balıqyetişdirmə və emalı müəssisəsinin tikintisinə və digər xərclərinə yönəltməklə cinayət yolu ilə əldə etdiyi külli miqdarda pul vəsaitlərini leqallaşdırıb. 

Boris Çonsonla Alimpaşa Məmmədovu müqayisə edən şəmkirlilər ingilsi baş nazirə dəstək olmaq üçün Birləşmiş Krallığın Azərbaycandakı səfirliyinə etiraz məktubu göndəriblər. Ağdam və Ağcabədi rayonlarının sakinləri isə Dövlət Təhlükəsizliyi Xidmətindən Vaqif Həsənovu Rafil Hüseynovu  unutmamağı xahiş edirlər. Hətta Ağcabədi rayonun bir qrup sakini Rafil Hüseynovun da yada düşməsi üçün Ağcabədidən Bakıya piyada yürüşə cəhd edib.  

Əgər, DTX-nın növbəti əməliyyatı Ağdam və ya Ağcabədi rayonlarından birində keçiriləsə, hesab edəcəm ki, həmyerlilərimin duaları qəbul olunub.