Tərtər hadisələri"nə görə həbs edilən şəxsin anası dələduzluğa məruz qalıb. Qadına oğlunun əfvə düşdüyünü deyən şəxslər ondan pul alıblar.
Hurriyyet.az xəbər verir ki, bu barədə aldadılan Məhsəti Hüseynovanın özü sosial şəbəkə hesabında məlumat paylaşıb.
M.Hüseynova qeyd edib ki, tanımadığı şəxslər ona zəng edərək oğlu İsmayıl Hüseynovun əfvə düşdüyünü deyiblər və təcili şəxsiyyət vəsiqəsinin surətini istəyiblər.
Ardınca isə ondan rüsum adı ilə 525 manat pul ödəməli olduğunu deyiblər. Məhsəti Hüseynova da həmin şəxslərə inanaraq pulu deyilən karta köçürüb və nəticədə aldadılıb.

Qeyd edək ki, İsmayıl Hüseynov 2016-cı ildə həbs edilib. Kəşfiyyatçı Hüseynov vətənə xəyanət ittihamı ilə 15 il həbs cəzası alıb.
Onu da xatırladaq ki, "Tərtər işi"nin yenidən araşdırılması üçün istintaq qrupu yaradılıb.