Gürcüstanın Ukraynadakı müvəqqəti işlər vəkili, baş məsləhətçi Sandro Topuria Mixail Saakaşvilinin həbsi ilə bağlı izahat vermək üçün Ukrayna Xarici İşlər Nazirliyinə (XİN) baş çəkib.
Bu barədə Ukrayna XİN-in mətbuat katibi Oleq Nikolenko açıqlayıb.
“Diplomat Ukrayna vətəndaşı Mixail Saakaşvilinin Gürcüstanda saxlanma şərtləri, ona qarşı irəli sürülən ittiham barədə məlumat verib”, - deyə o bildirib.
Nikolenko qeyd edib ki, Ukrayna tərəfi Saakaşvilinin qanuni hüquqlarına tam riayət olunmasının vacibliyini vurğulayıb, konsulluq və hüquqi yardım göstərmək üçün Ukrayna konsulunun onu ziyarət etməsini istəyib.
Eyni zamanda Nikolenko vurğulayıb ki, Xarici İşlər Nazirliyi Ukraynanın Gürcüstanın daxili işlərinə qarışmamaqla bağlı prinsipial mövqeyini təsdiqləyir.
Öz növbəsində, Gürcüstanın xarici işlər naziri David Zalkaliani Saakaşvilinin saxlanılması ilə bağlı Kiyevin mövqeyinə rəğbət bəslədiyini bildirib.
“Onların mövqeyi başa düşüləndir, çünki Saakaşvili onların vətəndaşıdır. Maraqlandıqları bütün məlumatları Ukrayna tərəfinə verəcək səfirliyin (Kiyevdəki) əməkdaşı ilə əlaqədə olmuşuq. Əminəm ki, sakit, sülh yolu ilə bütün məsələləri aydınlaşdıracağıq. Ukrayna ilə münasibətlərimiz əvvəlki kimi inkişaf edəcək”, - deyə Zalkalini bir nəfərin Gürcüstan və Ukrayna arasındakı strateji tərəfdaşlığı girov götürməsinin qəbuledilməz olduğunu vurğulayıb.
Xatırladaq ki, Saakaşvili bələdiyyə seçkiləri ərəfəsində Gürcüstana qayıdıb və saxlanılıb.