Ölkə başçısı İlham Əliyev Müdafiə Nazirlyinin N saylı hərbi hissəsinin açılışında çıxış edərkən Ermənistadakı hazırkı siyasi vəziyyətə də toxunub. 
Sozcu.info xəbər verir ki, dövlət başçısı Nikol Paşinyanın hakimiyyətə gəlişinin demokratik inqilab nəticəsində baş tutmadığını bildirib. “Ermənistanda demokratik inqilab olması ilə bağlı iddialar yalandır” deyən İlham Əliyev Ermənistandakı mövcud hakimiyyətin xarici dairələr tərəfindən idarə olunduğunu vurğulayıb.
Nikol Paşinyanın hakimiyyətə gəlişi ilə bağlı müxtəlif versiyalar var. Bunlardan biri də onun xarici dairələrin dəstəyi ilə hakimiyyəti dəyişməsidir. Təsadüfi deyil ki, Rusiya Paşinyan hakimiyyəti ilə sanki məsafə saxlayır. Kremlin Paşinyana mənfi münasibəti Rusiya KİV-lərində mütəmadi olaraq onun haqqında dərc edilən məqalələrdən görünür.
İlham Əliyev çıxışında Paşinyan və komandasının təmsil olunanların xarici fondlarla işləməsini qabardaraq Ermənistandakı hakimiyyət dəyişikliyinin xarici dairələrin ssnerasi olduğunu bir daha ortaya qoyub. 
Ölkə başçısı həmçinin qeyd edib ki, postsovet məkanındakı inqilabları təşkil edənlər indiki Ermənistan rəhbərliyinin himayədarlarıdır. 
Bəlkə də bu səbəbdəndir ki, Paşinyanın Qarabağla bağlı verdiyi absurd bəyanatlara göz yumulur. Halbuki onun çıxışları və davranışlarında beynəlxaql hüquq normaları kobud şəkildə pozulur.
Digər tərəfdən, demokratiya vədi ilə hakimiyyətə gələn Paşinyan indi özünü az qala diktator kimi aparır. Xüsusilə, rəqiblərini sıradan çıxarmaq üçün avtoritar üsul-idarəyə xas davranışlar sərgiləyir. 
İlham Əliyev çıxışında bu məqama da toxunub və konkret fakt göstərib. “Bir il bundan əvvəl həbsdə olan bir jurnalist axıra qədər aclıq elan edir və ölür. Heç bir beynəlxalq təşkilat, Avropa Şurası, ATƏT-in Media azadlığı ofisi bir səs belə çıxarmırlar. Nə üçün? Çünki bilirlər ki, indiki Ermənistanın rəhbərləri kimdir”, - deyə ölkə başçısı vuğulayıb.
Bu gün bütün bunlara görə Ermənistanın mövcud hakimiyyətindən ciddi narazılıq var. Paşinyan müxtəlif qüvvələrin dəstəyini qazanmağa çalışsa da, bu, onun üçün müşkülə çevrilib. Onun hakimiyyət qollarına nəzarəti öz əlində cəmləməsi, siyasi rəqiblərinə qarşı sərt addımlar atması, qaçaqmalçılığın, rüşvət və korrupsiyanın artması Paşinyanı artıq arzuolunmaz şəxsə çevirib.