"Əfqanıstanda vəziyyət gərgin olduğu üçün Qırğızıstanda ikinci Rusiya hərbi bazasının açılması ilə bağlı məsələ hələ ki qaldırılmayıb".
Sozcu.info"RİA Novosti"yə istinadla xəbər verir ki, bunu Qırğızıstanın xarici işlər naziri Ruslan Kazakbayev bildirib.
Nazir xatırladıb ki, Qırğızıstanda bir sıra strukturların daxil olduğu Birləşmiş Rusiya hərbi bazası fəaliyyət göstərir.
"Kantdakı baza KTMT Kollektiv Becid Reaksiya Qüvvələrinin bir aviasiya komponentidir və KTMT üzvü olan ölkələrin hərbi təhlükəsizliyinin təmini, habelə xarici təcavüzün dəfi və terrorizm əleyhinə birgə əks-hücumların həyata keçirilməsi üçün hazırlanıb".
Ruslan Kazakbayevin sözlərinə görə, Rusiya aviabazası regional təhlükəsizliyin təmin edilməsində və Rusiya Federasiyası ilə hərbi-texniki əməkdaşlığın gücləndirilməsində çox vacib amildir.
Kazakbayev qeyd edib ki, ümumiyyətlə, Qırğızıstan hər zaman Əfqanıstanla bağlı problemləri KTMT çərçivəsində müzakirə edir.
"Eyni zamanda, beynəlxalq terror təşkilatlarının Mərkəzi Asiya bölgəsinə mümkün nüfuz etmə yolunda ikinci xətt olaraq Qırğızıstan-Tacikistan sərhədinin birgə gücləndirilməsini də təcili hesab edirik", - deyə o vurğulayıb.
Xarici işlər naziri bu kontekstdə Qırğızıstanın Rusiya Federasiyası ilə fəal şəkildə çalışdığını söyləyib.
"Lakin respublika ərazisində başqa bir Rusiya hərbi bazasının açılması məsələsi hələ qaldırılmayıb", - deyə Kazakbaev vurğulayıb.