“Yeni Klinika”nın həbsdə olan sabiq direktoru Pərviz Abbasov məhkəmədə verdiyi ifadədə rüşvət alması ilə bağlı iddiaları rədd edib. Bildirib ki, nə pulu, nə də dəb-dəbəli mülkləri var. Onun sölərinə görə hətta ailəsinin yaşadığı ev də ipotekadadır.
Xatırladaq ki, vaxtilə yüksək vəzifə tutmuş digər məmurlar da analoji mövqedən çıxış edirlər. Məsələn İmişlinin hazırda həbsxanada olan icra başçısı Vilyam Hacıyev də vəzifədə olarkən kirayədə qaldığını söyləmişdi.
Azərbaycan cəmiyyəti sabiq məmurların məhkəmə zalında məzlum görkəm aldıqlarını, hətta göz yaşı axıtdıqlarının dəfələrlə şahidi olub. Bunun səbəbi nədir? Vəzifədə işləyən zaman canavar olanlar, niyə həbsə düşəndə quzuya dönürlər?
Azərbaycan Demokratik Partiyasının sədri Sərdar Cəlaloğlu məsələ ilə bağlı fikirlərini Yenisabah.az-la bölüşüb. O, hər bir hakimiyyətin pozucu təsirinin olduğunu bildirib:
“Hakimiyyət, vəzifə insanı böyük biri kimi göstərir. İstənilən hakimiyyətin pozucu təsiri var. Vəzifədə olan şəxs real kimliyindən daha güclü görünməyə çalışır. Lakin vəzifədən ayrılıb, hakimiyyətin gücü üstündən qalxan kimi qayıdır əvvəlki halına. Olur yazıq, məzlum, kimsəsiz bir insan.
İkinci məsələ isə pul ilə bağlıdır. Pul necə qazanılırsa, o cür də xərclənilir. Korrupsiya və rüşvətlə, insanlara təzyiq göstərib əmlakını əlinə almaqla qazanılan pullar cinayətkar insan psixologiyası formalaşdırır. Bu səbəbdən məmurların korrupsiya ilə başlayan cinayətkarlığı canavarlığa çevrirlir. Bu qeyri-sağlam yollarla əldə edilən pulun təsiridir”.
Cəlaloğlu normal cəmiyyətlərdə bu cür halların baş vermədiyini qeyd edib: “Digər ölkələrdə insanlar hakimiyyətdə olan zaman sakit, humanist olurlar. Vəzifədən getdikdən sonra bir qədər sərtləşirlər.
Bizdə isə anormal hakimiyyət təfəkkürü var. Çirkli pullarla cəmiyyətdə mövqe əldə olunur. Bu səbəbdən pulun, hakimiyyətin pozuculuğu və həmin hakimiyyətdə təmsil olunan insanların mənəvi düşkünlüyü birləşir, nəhəng idarəetmə qüsurlarını meydana çıxarır.
Vəzifəyə gətirilməmişdən öncə məsum, sakit, mələk qismində görünən insan hakimiyyətə gəlir və içindən canavar çıxır, Allaha qarşı üsyan edir. Azərbaycan məmurlarının 99%-i bu qəbildəndir. Layiq olmayan səlahiyyət əldə edirlər, qeyri-qanuni yollarla sərvətlər toplayırlar. Lakin düşünmürlər ki, hakimiyyət və sərvət insanın şəxsiyyətinə təsir etməməlidir. Şəxsiyyət problemi, hakimiyyət və pul birləşir bu faktor ortaya çıxır.
Bizdə qənimət qeyri-qanuni, şəxsiyyət isə qüsurludur. Yoxsa nə vəzifə, nə pul əsl insanı vəhşiləşdirməz”.