Prezident İlham Əliyevin Misir Ərəb Respublikasına rəsmi səfəri iki ölkə arasındakı münasibətlərin möhkəmlənməsi və əməkdaşlığın dərinləşdirilməsi baxımından yeni inkişaf mərhələsinin başlanğıcı oldu.

Qahirədə Azərbaycan Prezidenti cənab İlham Əliyev və Misir Prezidenti Əbdülfəttah əs-Sisi arasında keçirilən görüş çərçivəsində imzalanan sənədlər iki ölkə arasındakı iqtisadi əməkdaşlığın daha da möhkəmlənməsinə xidmət edəcək.

Prezident İlham Əliyev çıxışında Azərbaycan və Misir arasındakı əlaqələrin strateji əhəmiyyətini vurğuladı. O, xüsusilə energetika, nəqliyyat və əczaçılıq sahələrində əməkdaşlığın genişləndirilməsinin vacibliyini qeyd etdi. Azərbaycanın Qoşulmama Hərəkatına sədrliyi çərçivəsində həyata keçirilən işləri də diqqətə çatdıran Prezident İlham Əliyev Misirin Fələstin-İsrail münaqişəsinin həllinə yönəlmiş səylərini yüksək qiymətləndirdi.

Ermənistanla sərhəd məsələlərində əldə olunan irəliləyişləri müzakirə edərək, bölgədə sülhün və təhlükəsizliyin təmin olunmasının əhəmiyyətini vurğuladı.

İki ölkə arasında iqtisadi-ticari əlaqələrin inkişafı üçün birgə komissiyanın növbəti iclasının keçirilməsinin vacibliyini qeyd edən Prezident İlham Əliyev bu addımın iqtisadi əməkdaşlığın daha da möhkəmlənməsinə xidmət edəcəyini bildirdi.

Prezident İlham Əliyev çıxışında Azərbaycan-Misir arasında dostluq və qardaşlıq münasibətlərinin daha da gücləndirilməsinə dair səylərə görə təşəkkürünü ifadə etdi.

Ümumilikdə, dövlət başçılarının mətbuata verdikləri bəyanatlarda strateji əlaqələrin möhkəmləndirilməsi, regional sülh və sabitliyin təmin edilməsi və iqtisadi əməkdaşlığın genişləndirilməsi istiqamətində önəmli mesajlar verildi. Bu bəyanatlar Azərbaycan-Misir arasındakı səmərəli əməkdaşlığın və strateji tərəfdaşlığın davam etdirilməsinə dair əminliyi bir daha təsdiqlədi.

Afaq Səfərova

Suraxanı rayonu, 275 nömrəli tam orta məktəbin tərbiyə işləri üzrə direktor müavini

Sozcu.info