Sentyabrın 27-dən başlayan genişmiqyaslı əks-hücum əməliyyatı nəticəsində artıq 130-a yaxın yaşayış məntəqəmiz erməni işğalından azad edilib. Demək olar ki, hər gün işğal altında olan torpaqlarımızın müəyyən hissəsi düşmən tapdağından xilas olur. Ard-arda gələn qələbə xəbərləri insanlarda yüksək əhval-ruhiyyə yaradıb.
Maraqlıdır, cəbhədə əldə olunan qələbələr cəmiyyətə necə yansıyıb?
Məsələ ilə bağlı Yenisabah.az-a danışan psixoloq Vüsalə Rüstəm qeyd edib ki, cəmiyyətdə uzun illər yığılıb qalmış bir nisgil, torpaq həsrəti var idi:
“Tarixən biz mübariz, qoçaq, igid xalq olmuşuq. Bunlar pafoslu cümlələr deyil, tarixi həqiqətlərdir. Türkün tarix boyu yarıda qoyduğu heç bir hadisə olmayıb. Bizdə də bu belə idi, heç kim əzəli düşmənimiz olan erməni vandallarının 27-30 il əvvəl törətdiyi cinayətləri və torpaq itkisini özünə bağışlaya bilmirdi. Cəbhədə əldə olunan uğurlar hər kəsin daxilində yatmış vətənpərvərlik hissini alovlandırdı. Fəhləsindən tutmuş məmurunadək hər kəsin diqqəti prezidentimiz İlham Əliyevin mavi ekranda etdiyi çıxışlarda və ya “Twitter”də atdığı “tweet”lərdədir. Qələbə istəyi ilə alışıb yanırıq. Hər kəs düşmən tapdağında olan Qarabağımızın mənfur düşməndən xilas olunmasını səbirsizliklə gözləyir”.
Qarabağ müharibəsinin parlaq qələbə ilə başa çatması Azərbaycan cəmiyyətində nəyi dəyişəcək?
Həmsöhbətimiz hesab edir ki, Qarabağ müharibəsinin parlaq qələbə ilə başa çatması cəmiyyətdə ciddi dəyişikliklərə səbəb olacaq:
“Bölgədə Azərbaycanın həm hərbi, həm də iqtisadi gücü daha da artacaq. Erməni terrorçularını neytrallaşdırdığımız üçün bölgədə sülh carçısı kimi hər kəs bizimlə hesablaşacaq. Biz qələbədən əvvəl də gözəl xalq idik, qələbədən sonra da bu, belə olacaq. İllərlə insanlarımızın torpaq itkisi, öz vətənində məcburi köçkün həyatı sürməsi onlara çox şey öyrətdi. Vətənimizin bir daşına, qayasına belə biganə yanaşmayacağıq, daha diqqətli olub canımız Azərbaycanı göz bəbəyimiz kimi qoruyacağıq, bu, hər birimizin bundan sonra da ən şərəfli vəzifəsi olacaq. Qarabağ Azərbaycanın döyünən ürəyidir. Ürəyimizi bundan sonra da göz bəbəyimiz kimi qorumalıyıq. Məmləkətin hər daşında vətən oğullarının qanı var”.