Ötən gün rəşadətli Azərbaycan ordusu tərəfindən daha 24 kənd və Zəngilan şəhəri işğaldan azad edilib. Beləliklə, bu günədək Azərbaycanın 100 yaşayış məntəqəsi ermənilərdən təmizlənib.
Maraqlıdır, Zəngilanın işğaldan azad edilməsi Azərbaycan Ordusuna hansı üstünlükləri vəd edir?
Qarabağ qazisi, hərbi jurnalist Rey Kərimoğlu məsələ ilə bağlı Yenisabah.az-a açıqlamasında bildirib ki, hər bir kəndin, rayonun azad edilməsi növbəti uğurun başlanğıcıdır:
“Amma hər hansı ərazimizi azad etdikdən sonra növbəti hədəfin hara olduğunu konkret şəkildə demək olmaz, strateji məsələlər var. Hazırda bu mövzuda ümumi danışmaq olar. Burada mühüm məsələ odur ki, illərlə işğal altında olan torpağımız azad edilib, düşmən məğlub olub, ağır itki verib, nəticədə xalqımız ruhlanıb. Çünki illərlə gözlədikləri o gün gəlib. Bu da Azərbaycan Ordusunun növbəti uğurlarının stimuludur. Azərbaycan Ordusu bu gün çox yüksək səviyyədədir, ən müasir silahlarla təchiz edilib. Tam maddi-tekniki baza mövcuddur. Mən ordu ilə əlaqəsi olan bir şəxsəm. Hazırda da xidmətdəyik. Qarabağ qazilər birliyinin heyəti ön cəbhədədir. Əsgərlərimizə dayağıq. Onlarla bir yerdə yeyib-içirik, xidmət edirik. Buradakı ruh, atmosfer çox möhtəşəmdir, bir əsgərdə belə döyüşlə bağlı narahatlıq yoxdur. Hər biri döyüşə atılmaq istəyir. Döyüşdə şəhid olan əsgərin yerinə bəzən 50 əsgər özünü atır. Qələbə ruh yüksəkliyi və inam yaradıb. Möhtəşəmliyi sözlə ifadə etmək mümkün deyil. Ermənilər düşünürdülər ki, Gəncəni bombalayıb dinc əhalini öldürəcəklər və bununla da azərbaycanlıların gözü qorxacaq. Əksinə, xalqımız bu erməni vəhşiliklərindən sonra daha da birləşdi. Bu da bütövlükdə ordumuza çox böyük dəstək olur.  Hazırda bütün cəbhəboyu ordumuz əməliyyat tapşırıqlarını yerinə yetirir. Prezident İlham Əliyevin də dediyi kimi, Şuşaya bayraq sancılana qədər bu proseslər davam edəcək. Azərbaycan öz hüquqi dövlətinin hüquqi ərazisi olan Qarabağı bütövlükdə düşməndən azad edəcək”.
Həmsöhbətimiz iki məsələni oxucularımızın diqqətinə çatdırmaq istəyib:
“Birincisi, feysbuk istifadəçilərinin şəhid şəkilləri paylaşması ilə bağlıdır. Hesab edirəm ki, bu, məqsədəuyğun deyil. Hazırkı məqamda o, əks-effekt verir. Düşmən bizim üçün əziz olan şəhidimizin şəklini götürüb təhqiramiz sözlərlə paylaşır. Bu dəqiqə onlar məğlub olduqları üçün çox aqressivdirlər, hər yola əl atırlar. Xahiş edirik, hələlik şəhidlərimizlə bağlı heç bir xəbər yaymasınlar, erməniləri sevindirməsinlər. Müharibədir, təbii olaraq şəhidimiz də, qazimiz də var. Lakin müharibə standartlarını nəzərə aldıqda şəhidimizin olduqca az olduğunu deyə bilərəm. Ordumuz o qədər peşəkar şəkildə döyüşür ki, hər şey minimum itki ilə həll olunur. Digər bir məsələ isə yayılan xəbərlərlə bağlıdır. Müharibə gedir, əsgərlərimiz döyüşür, kiminsə əlinə telefon düşəndə hansısa bir yerin alındığını deyə bilir, bu da həmin dəqiqə geniş yayılır.
Bir müddət sonra isə yayılan xəbərin doğru olmadığı ortaya çıxır, bu da özlüyündə ruh düşkünlüyü yarada bilir. Belə şey etmək olmaz. Müdafiə Nazirliyinin, Prezidentin açıqlamadığı xəbərləri yaymasınlar. Biz oktyabrın 2-dən Qarabağ qazilər birliyinin nümayəndə heyəti olaraq Müdafiə Nazirliyinin xətti ilə cəbhədəyik, bütün bu bölgəni gəzib tapşırıqları yerinə yetiririk. And olsun Allaha, burada nə bir pakistanlı, nə türk, nə suriyalı var. Burada vuruşan ancaq Azərbaycan əsgəridir, başqa heç kim yoxdur, bu, həqiqətən belədir, əgər belə olmasa, mən susardım, amma vallah, başqa ölkə vətəndaşı yoxdur”.