«Qarabağ»ın «Ludoqorets»ə məğlubiyyətini şok kimi qarşılayanlar çoxdur.

İnanılmaz gəlir onlara.

«Braqa» və «Bayer» kimi Avropanın adlı-sanlı komandalarının Bakıda nə hala salınmasını görmüş azarkeşə təəccüblü gəlir «Ludoqorets»ə yenilgi. 87-ci dəqiqədə vurulan qolun mənfi təsirindən hələ də ayılmır tərəfdar.

«Qarabağ» oyuna tam köklənməmişdi. Bunu Qurban Qurbanov 1 gün öncədən anons etmişdi. «Biz bu matça istədiyimiz kimi hazırlaşa bilmədik»açıqlaması elə bu deməkdir.

Qurbanovu biz düz danışan insan olaraq tanımışıq və bir daha gördük ki, o, həqiqəti açıq ifadə eləməkdən çəkinməyib.

Nə varsa, elə buradadır, elə bu açıqlamasının içindədir. Komandanın düzəni, ümumi durumu Qurbanovu razı salsaydı, heç şübhəsiz, fərqli danışar, analiz edərdi.

«Dinamo» ilə oyunlar «Qarabağ»ın futbolçularının başının altına yastıq qoydu. Minsk klubu ilə qarşılaşan «Ludoqorets»lə dünən Bakıda izlədiyimiz «Ludoqorets» arasında dağlar qədər fərq var.

O «Ludoqorets» hara, dünənki «Ludoqorets» hara! Düzdür, mərhələni keçərək bura gəliblər, amma «Dinamo»nun uduzmağa layiq olmadığını söyləməliyik.

Belaruslar qaçırdığı qol epizodları ilə Bakıya bilet almaq imkanını boşa verdilər. Xüsusən Macarıstanda keçirdikləri və nominal ev sahibi olduqları cavab matçında.

Qurban Qurbanov bu oyun üçün Macaıstanda idi. Tribunada əyləşmiş, 90 dəqiqə gözünü meydandan çəkməmişdi.

Gəlib burada «Qarabağ»ı «Ludoqorets»dən gizlətmişdi. «Araz-Naxçıvan» ilə Premyer Liqanın açılış oyununa ikinci heyəti buraxmaqla.

Lap asan deməzdim də, əksər futbolçularının 2-3 qolluq qələbə gözləntisi «Qarabağ»ı dünən məğlubiyyətin ayağına gətirdi. «Ludoqorets»i yüzdəyüz ciddiyə almadıqları göründü.

Qurbanovun «biz bu matça istədiyimiz kimi hazırlaşa bilmədik» etirafının açması yəni. 

\\Sportinfo.az