ABŞ Prezidenti Donald Tramp köməkçilərinə Tehranla danışıqların anlaşma memorandumunda müəyyən edilmiş 60 günlük müddətdən kənara çıxmasında heç bir problem görmədiyini bildirib.

Sozcu.info xəbər verir ki, məlumatı The Wall Street Journal (WSJ) mənbələrə istinadən yayıb. Həmin mənbələrə görə, Amerika lideri son günlərdə Pentaqonunn rəhbəri Pit Heqset və Birləşmiş Qərargah Rəisləri Komitəsinin sədri general Den Keyn ilə bir neçə görüş keçirib və orada İrana qarşı hərbi əməliyyatların bərpası ehtimalı müzakirə olunub.

Tramp hesab edir ki, əlavə tammiqyaslı hücumlar diplomatik səylərə mane olacaq və Vaşinqtonun İranın nüvə proqramının ləğvinə nail olmaq şanslarını azaldacaq.

Nəşr vurğulayır ki, Tramp bu məsələ ilə bağlı yekun qərar verməyib. Lakin prezident köməkçilərinə İranla nüvə sazişi üzrə danışıqların 18 avqust tarixindən sonraya qədər uzanmasına etiraz etməyəcəyini bildirib.
The Wall Street Journal həmçinin xəbər verir ki, gərginliyi azaltmaq üçün ABŞ Mərkəzi Komandanlığı ilə SEPAH arasında böhran idarəetmə kanalının yaradılması üçün addımlar atılıb. Bəzi ABŞ rəsmiləri nəşrə bunu Vaşinqton və Tehran arasında münasibətlərin yaxşılaşmasının sübutu kimi gördüklərini, digərləri isə bu təşəbbüsün yalnız həyata keçirilmənin ilkin mərhələsində olduğunu qeyd ediblər. Ağ Ev rəsmisi qəzetə bildirib ki, münaqişə idarəetmə kanalı artıq açıqdır və hər iki tərəf tərəfindən istifadə olunur.

Xatırladaq ki, dünən İran Xarici İşlər Nazirliyinin sözçüsü İsmayıl Baqeyi Tehran və Vaşinqton arasında əlaqələrin hərbi deyil, siyasi kanallar vasitəsilə aparıldığını bildirib.

Musavat.com