Hurriyyet.az xəbər verir ki, Əfqanıstanda hakimiyyəti ələ keçirən “Taliban” təşkilatının mühüm şəxslərinin siyasi məsələlərdə bir-birinə qarşı çıxdıqları iddia edilir. “BBC Peştu” redaksiyasının “Taliban”dakı mənbələrindən aldığı məlumata görə, təşkilatın yaradıcılarından biri və Baş nazirin müavini olan Molla Əbdülqəni Bəradər ilə qurumun “Hakkani” adalanan siyasi qanadının lideri, Miqrasiya naziri Xəlil əl Rəhman Hakkani arasında mübahisə baş verib. Anlaşılmazlığın səbəbi “Taliban”ın zəfərində diplomatiyanın, yoxsa silahların həlledici rol oynaması məsələsindəki fikir ayrılığıdır. Ötən il Qətərdə aparılan müzakirələrin əsas iştirakçılarından olan Bəradər diplomatiyanın, Hakkani qrupu isə silahların daha güclü olduğunu bildirir. “Taliban”dakı mənbə Bəradər ilə Hakkani arasında yeni hökumətin qurulması məsələsində də mübahisə baş verdiyini söyləyib. Kabula səfər edən Qətər Xarici İşlər naziri Əbdürrəhman əl Sani ilə danışıqlarda iştirak etməyən Bəradərin Kabulu tərk elədiyi, həmçinin, “Taliban”ın dini lideri Molla Axundzadə barəsində xəbər olmadığı da iddia edilir.