Ukraynanın Dövlət Sərhəd Xidməti Gürcüstanın keçmiş Prezidenti Mixail Saakaşvilinin ölkədən necə getməsini araşdırmağa başlayıb.
Cia.az “RİA Novosti”yə istinadən xəbər verir ki, sərhəd bazasında Saakaşvilinin ölkəni tərk etməsi ilə bağlı heç bir məlumatın olmadığı məlum olub.
Bildirilir ki, Saakaşvili ölkə sərhədini qanunsuz şəkildə tərk edib. Belə ki, ilkin ehtimallara görə, Mixail Saakaşvili sərhədi dəniz vasitəsilə bərə ilə keçib.
Qeyd edək ki, Mixail Saakaşvilinin Gürcüstan ərazisinə qanunsuz yolla keçməsinə kömək edən daha iki nəfər saxlanılıb. Saxlanılanlar Poti sakinləri olan ata və oğuldur. Bundan əvvəl isə Saakaşvilinin Tbilisidə gizləndiyi evin sahibi saxlanılıb.
Xatırladaq ki, oktyabrın 1-də 8 ildən sonra Gürcüstana qayıdan Mixail Saakaşvili saxlanılıb. Onun Tbilisi yaxınlığındakı Rustavi həbsxanasında saxlanıldığı bildirilir.
Saakaşvili parlamentin deputatı Valeri Gelaşvilinin döyülməsi və “Gürcüstan Birləşmiş Bankının” əməkdaşı Sandro Girqvlianinin öldürülməsi işi üzrə məhkəmənin üç instansiyası tərəfindən təqsirli bilinir.
Bu yaxınlarda Baş nazir İrakli Qaribaşvili Saakaşviliyə qarşı kəskin ittihamlar irəli sürüb. Hökumət rəhbərinin sözlərinə görə, Saakaşvili və onun komandası ölkədə iğtişaşlara səbəb olmaq və ölkə hakimiyyətini bunda günahlandırmaq məqsədilə gürcü müxaliflərin qətlə yetirilməsini planlaşdırıblar.