Bir neçə gündən sonra Qorxmaz Hüseynovun “Azərsu” Açıq Səhmdar Cəmiyyətinin sədri vəzifəsindən azad edilməsinin bir ili tamam olacaq. Ötən müddət ərzində “Azərsu” ASC-yə sədr təyin olunmayıb və Səhmdar Cəmiyyətə rəhbərlik müvəqqəti olaraq sədrin istismar üzrə müavini Köçərli Həsənova həvalə edilib. “Azərsu” ASC-yə sədr əvəzinin  Köçərli Həsənova həvalə edilməsi çox gözlənilməz oldu. Çünki normal halda sədri əvəz etmək birinci müavini Teyyub Cabbarova həvalə edilməli idi. Ancaq hansısa “sehirli əl”in müdaxiləsindən sonra sədrlik müvəqqəti olaraq Köçərli Həsənova həvalə edildi. Ötən bir ildə ölkə əhalisinin içməli su ilə təmini qurumun müvəqqəti sədrin rəhbərliyi altında fəaliyyət göstərir.
 
Məlumatlara görə, Qorxmaz Hüseynovun vəzifəsindən azad edilməsinin bir ili yaxınlaşdıqca “Azərsu” ASC-yə yeni sədr təyin olunacağı ehtimalı da artıb. Bu isə “Azərsu” ASC-i uğrunda mübarizəni qızışdırıb. İddialara görə, “Azərsu” ASC-i uğrunda bir neçə iqtidardaxili qruplaşma mübarizə aparır. “Azərsu” ASC-nin Köçərli Həsənova həvalə edilməsinə nail olanlar mövqelərini qoruyub saxlamağa  çalışırlar. Ancaq digər qruplaşmalar Köçərli Həsənovun təyinatına mane olmağa çalışırlar. Məlumatlara görə, “Azərsu” ASC-də əksəriyyət Səhmdar Cəmiyyətə birinci müavini Teyyub Cabbarovun və ya müavin Seymur Seyidovun təyin olunmasını arzulayır. Ancaq sədr seçkili olmadığı üçün “Azərsu” ASC-nin əməkdaşlarının mövqeyi nəzərə alınmayacaq.
 
Məlumatlara görə, prezident İlham Əliyev iqtidardaxili qruplaşmaların oyunlarının əksinə olaraq “Azərsu” ASC-yə yeni sədri Səhmdar Cəmiyyətin rəhbər şəxsləri arasından təyin etmək istəmir. İddialara görə, Zaur Mikayılovun Meliorasiya və Su Təsərrüfatı Açıq Səhmdar Cəmiyyətinə sədr təyin olunduğu kimi “Azərsu” ASC-yə sədr də yeni şəxs olacaq.
 
Ancaq “Azərsu” ASC-i ilə Meliorasiya və Su Təsərrüfatı ASC-nin birləşdirilməsi ehtimalı da istisna olunmur. Belə olacağı halda Zaur Mikayılovun birləşmiş Səhmdar Cəmiyyətin sədri olmaq ehtimalı yüksək olacaq. Hətta Zaur Mikayılov birləşmiş Səhmdar Cəmiyyətin sədri təyin olunmasa belə, “Azərsu” ASC-nin rəhbərlərinin heç birinin yeni quruma sədr təyin olmaq şansı olmayacaq.
A.Nəbiyev,
Sozcu.info