Əvvəlki Sonrakı

İlham Əliyevdən Şuşa ilə bağlı paylaşım - VİDEO

8-11-2024, 10:40

Gürcüstanda bəzi məntəqələrdə seçkilərin nəticələri ləğv edilib

5-11-2024, 21:00

Hizbullahın yeni lideri ilk müraciətini yaydı - Mübarizə sözü verdi

30-10-2024, 18:46

"Türkiyə terror hücumlarının hansı məqsədlə həyata keçirildiyini bilir" - Ərdoğan

25-10-2024, 19:08

Putin Kiyevin Ərdoğanın sülh danışıqları təklifindən imtina etdiyini açıqlayıb

24-10-2024, 21:29

“Gürcüstanda əsl azadlıq son 4 ildə baş verdi”

 

Ruslan Hacıyev: "Ramiz Həsənovun Marneuliyə gəlişi hansısa namizədə dəstək xarakterli deyildi”

"Gürcüstanda təhsil sahəsində kadr problemimiz var… Müəllimlərin böyük əksəriyyətinin yaşı 60-dan yuxarıdır”

Oktyabrın 8-də Gürcüstanda keçirilən parlament seçkiləri Azərbaycanda da böyük maraqla izləndi. Ən azı ona görə ki, bu seçkidə Gürcüstanda yaşayan soydaşlarımız da öz aktivliyi ilə yadda qaldı. Təsadüfi deyil ki, parlament seçkilərində 30 nəfərə yaxın azərbaycanlı öz namizədliyini irəli sürmüşdü. Doğrudur, seçki zaman soydaşlarımızın ən çox yaşadığı Marneuli rayonunda müəyyən xoşagəlməz hallar da yaşandı. Belə ki, rayonun Qızılhacılı kəndində polislə qarşıdurma nəticəsində 6 nəfər gənc həbs olundu...
Bəs, Marneulidə seçkisonrası vəziyyət necədir? Bölgədə stabillik bərpa olunub? Bu və digər suallara 8 oktyabrda hakim "Gürcü arzusu” Partiyasının majoritar namizədi kimi seçicilərin ən çox etimadını qazanaraq deputat seçilən Ruslan Hacıyevlə söhbətimizdə cavab tapmağa çalışdıq. 

- Ruslan müəllim, Marneulidə və ümumiyyətlə Gürcüstanda seçkisonrası vəziyyət nə yerdədir? 

- Bildiyiniz kimi, oktyabrın 8-də Gürcüstanda demokratik, şəffaf parlament seçkiləri keçirildi. Demokratiyanın ən birinci göstəricisi o idi ki, ölkənin bir çox rayonlarında ikinci tur baş tutdu. Mən - Ruslan Hacıyev Marneuli 35-ci seçki dairəsindən birinci turda parlamentə deputat seçildim. Təəssüf ki, seçki vaxtı Marneulinin 36-cı seçki dairəsində bəzi müxalif insanların yaratdığı təxribatlar nəticəsində insidentlər baş verdi, xüsusən də Qızılhacılı kəndində. Müxalifət tərəfindən seçki dairəsi yerləşən məktəb daşqalaq olundu, şüşə-pəncərələri sındırıldı və çox pis vəziyyətə salındı. Hansı ki, biz necə illərdir dövlətimizin, o cümlədən də Azərbaycan dövlətinin, SOCAR-ın dəstəyi ilə məktəblərin təmirinin həyata keçirilməsinə çalışırıq. Bunlar isə gəlib bir gündə məktəbi dağıtdılar. Bunun da adını qoydular ki, guya, seçkidə hardasa səhvlər buraxılıb, ona görə məktəbi uçurub-dağıtdılar. Bütün bunların nəticəsində də sonrakı proseslərdə bir az narazılıqlar yaranmışdı. Bu da nədən yaranmışdı? Müxalifət dünya ilə bir etməyə çalışırdı ki, Gürcüstanda azərbaycanlılar sıxışdırılır, hardasa kimisə vurdular, kiməsə milli, dini zəmində təzyiq olundu və s. Təbii ki, tamamilə yanlış informasiyalar idi. Ümumiyyətlə, bildiyimiz kimi, bizim Gürcüstanda heç vaxt milli, dini zəmində problemlərimiz olmayıb…

- O halda 1990-cı ilin əvvəllərində, Qamsaxurdiya hakimiyyəti dönəmində baş verən hadisələrə nə ad qoymaq olar?

-1990-cı ilin əvvəllərində baş verən hadisələr milli və dini zəmində deyildi. Sovet rejimi dağılandan sonra Sovetlər Birliyinə bağlı olan ölkələrin hamısında o dalğalar var idi, təxribat yönümülü hadisələr baş verirdi. Sonrlar, xüsusən də son 4 il ərzində "Gürcü arzusu” Partiyasının hakimiyyəti dönəmində insanlar Gürcüstanda tam demokratik həyat tərzi sürməkdədirlər. Müxalifətin bizə qarşı ən böyük iradlarından biri budur ki, niyə polis filankəsi tutmur, sıxmır?! Polisin tutmağı, sıxmağı hansı cəmiyyətə uyğundur? Polis cinayətkarı tutmalıdır. Ona görə də, bunlar bu işlərdən nəticə çıxarmayanda, hansısa məsələni "milli və dini zəmində baş verən hadisə” kimi ortaya atırlar. Buna da nail ola bilmədilər. Gürcüstanda yaşayan azərbaycanlıların - ağsaqqallarımızın, gənclərimizin, o cümlədən Azərbaycanda yaşayan Gürcüstan əsilli qardaşlarımızın və Gürcüstan hökumətinin düzgün qərarı nəticəsində burada proseslər nəzarətdə saxlanıldı. İndi də şahidi olursunuz ki, burda heç bir problem yoxdur.

- Yeri gəlmişkən, Azərbaycanın bəzi rəsmi şəxslərinin, məsələn Ramiz Həsənovun Marneulidəki təkrar seçkilərdən bir gün əvvəl rayona gələrək, hakim partiyanın qeyri-azərbaycanlı namizədi ilə görüşməsi heç də birmənalı qarşılanmadı. Hansı ki, bəzi şəxslər bunu milli maraqlarımıza zidd addım kimi təqdim etdilər… 

- Milli maraqlara zidd heç bir addım atılmayıb. Azərbaycanın yüksək vəzifəli şəxsləri Gürcüstana hər zaman gəlirlər. Hər zaman da burda yaşayan azərbaycanlıların problemləri ilə maraqlanırlar. Bəli, adını çəkdiyiniz hörmətli eloğlumuz seçkidən əvvəl də gəlmişdi, seçki sonrası da gələ bilər. Eləcə də digər məmurlar. Gürcüstan hökuməti onları hər zaman dəvət edir, gəlib hökumət rəsmiləri ilə görüşlər keçirəndən sonra bizim bölgəyə də baş çəkirlər, azərbaycanlıların içərisində olurlar. Odur ki, bu, heç bir namizədə dəstək xarakterli deyildi. Sadəcə olaraq nə desinlər, nə söyləsinlər. Məğlub olduqlarını necə izah etsinlər. Məğlub oldular, təxribat törətdilər, Qızılhacılıda gəncləri cinayətə itələdilər, onların həbsinə bais oldular. Hamısı bunların işlərinin, təxribatlarının nətcəsi idi. İndi nə söyləsinlər? Azərbaycandan məmurlar gəldi, dəstəklədi, biz uduzduq? Eləmi? Yalan danışırlar. Azərbaycan hökumətindən hər zaman gəliblər. Sıravi insanlar da gələ bilərlər. Biz də hər zaman onları qarşılamağa hazırıq. 

- Bu təxribatlara görə müxalifəti ittiham edirsiniz. Sizcə, burada xarici qüvvələrin də rolu ola bilməzdi?

-Bildiyiniz kimi, bölgəmizdə aktiv dövrdə istər-istəməz başqa qüvvələrin, üçüncü qüvvənin də marağı ola bilər. Bunu inkar etmək olmaz. Amma bugünkü duruma görə məsuliyyət daşıyan sırf radikal, separatçı nöqteyi-nəzərdən yanaşan müxalifət idi. Mən demirəm ki, müxalifətin burda, rayonda yaşayan havadarları idi. Onun başında duran havadarları vardı, hansılar ki, uzun illər ölkəyə rəhbərlik etmişdilər. Amma biz sonunda gördük ki, azərbaycanlılara qarşı elə də xoş, qardaşlıq münasibətləri yox imiş. Keçmiş hakimiyyəti nəzərdə tuturam.

- Bəs hazırda həbsdə olan gənclərin taleyi necə olacaq? Bir millət vəkili olaraq bu məsələ ilə maraqlanmısınız?

- Onlardan bir nəfər artıq sərbəst buraxılıb. Beş nəfərlə bağlı istintaq davam edir. Əlimizdən gələni edirik ki, inşallah, onlar da azadlıqda olsun.

- İlk dəfə olaraq Gürcüstanda 30 nəfərə yaxın soydaşımız deputatlığa namizədliyini irəli sürdü. Amma onlardan cəmi 4 nəfər mandat əldə etdi. Sizcə, bu mandatı sadəcə haqqı olanlar qazandı, yoxsa onu haqq edib, seçkidən kənarda qalanlar da oldu?

- Təbii ki, haqqı olan qazandı. Biz seçkiqabağı xalqın içinə gedəndə söyləməyə sözümüz vardı deyə getdik. Və uzun illər hakimiyyətdə olan, parlamentdə oturan insanların bu bölgədə, bu xalqın içərisində seçkidən-seçkiyə olduqları özünü büruzə verdi. Üstəlik, biz xalqın içərisinə əlidolu getdik. Şəxsən mən söylədim ki, iki il Marneuli təhsil idarəsinin rəhbəri olaraq çalışmışam və bu müddət ərzində 20-dən yuxarı məktəbi təmir etdirmişəm. Əlbəttə, dövlətin dəstəyi ilə. Amma bunun səbəbi olmuşam. Bu, 25 ildə niyə olmurdu? 25 ildə niyə məktəblər uçub-dağılırdı? Amma "Gürcü arzusu” Partiyası hakimiyyətə gələndən sonra məktəblərimiz də təmir olunmağa başladı, insanlarımıza, bölgəmizə də daha çox diqqət yetirildi. Bölgəmizdə aşağıfaizli kerditlər verildi. Siz eşitmisiniz 3 faizlə kredit verilsin? Bu, "Gürcü arzusu” Partiyasının işi idi. 
Kənd təsərrüfatının inkişafı sahəsində də çox ciddi işlər görülüb. Bu gün Dəmyə Gorarxında, Təkəlidə, eləcə də Marneulinin bir çox kəndlərində bütün standartlara uyğun istixanalar fəaliyyət göstərir. Biz artıq kənd təsərrüfatı məhsullarını, tutaq ki, pomidoru, xiyarı, digər tərəvəz məhsullarını Türkiyədən idxal etmirik. Hansı ki, bunlar son 4 ildə baş verdi. Bunu hökumətimiz piar etmədi. Kobud desəm, edtiyini xalqın başına qaxmadısa, bu, o demək deyil ki, bunu etmədi…

- Amma onu da etiraf edək ki, hazırda Borçalıda xeyli sayda soydaşımızın ciddi kredit problemi mövcuddur. Məsələn, bir çox insan banka girov qoyduğu evini itirmək təhlükəsi ilə qarşılaşıb… 

- Tamamilə razıyam. O insanlar ki, kredit götürdülər və planlı şəkildə istifadə etdilər, bizneslərinin inkişafına qoydular, bu gün o insanlar böyük fermerdir, iş adamıdır. O insanlar ki, toy etmək, hansısa bir tədbir keçirmək üçün kredit götürdülər, onların problemləri yarandı. Təbii ki, bank öz pulundan keçəsi deyil. Amma hal-hazırda biz onun üzərində düşünürük, çalışırıq ki, problemi həll edək. Bunun üçün də banklarla danışıqlar aparırıq. İndi biz onu nə formada parlamentə çıxaracağıq, qanun şəklində necə qəbul edəcəyik, onun üzərində çalışırıq. Əlimizdən gələni edirik ki, müəyyən güzəştlərə, faizlərin aşağı salınmasına nail olaq. Amma insanlarımız gedib kredit götürüb, hansı istiqamətdə xərcləməli olduğuna da diqqət etməlidir. Bəli, xəbərimiz var ki, bəzilərinin evləri banklardadır. Biz çalışırıq ki, bank o evləri almasın, bir yolunu tapaq. Təbii ki, bunun üçün də dövlət səviyyəsində banklarla danışıqlar aparılmalı və vətəndaşlarımızı da düz yola istiqamətləndirməliyik.

- Ruslan müəllim, sizcə, bu gün Gürcüstanda soydaşlarımızın özlərinə xas hansı problemləri var?

-Bizim problemlərimiz 2012-ci ilə qədər çox idi. Sadəcə olaraq həmin problemlər ört-basdır edilirdi. Səsimizi çıxarmağa qorxurduq. Gürcüstanda yaşayan azərbaycanlılar hansısa probleminin olduğunu deyə bilmirdi. Ona görə ki, çox təzyiqlər, basqılar vardı. Bu gün niyə müəyyən problemlər görünür? Çünki hamısını sərbəst şəkildə söyləyə bilirsən. Kimdənsə çəkinim, problemi deməyim, bu gün o hal yoxdur. Ona görə, mən deyirəm ki, Gürcüstanda əsl azadlıq son 4 ildə baş verdi. Problemlərimiz var. Gürcüstanın hər bir ərazisində olan problemlər azərbaycanlıların kompakt yaşadığı ərazidə də var. İstər iqtisadi, istər sosial, istər səhiyyə sahəsində və s. hər bir sahədə problem var. Amma bu problemlərimizin həlli yönündə nə edirik? Bu çox önəmli məsələdir. Təbii ki, mənim üçün prioritet məsələrdən biri təhsil sahəsində olan problemlər, xüsusən də məktəblərin təmiri məsələsidir. 2012-ci ildən təhsil sahəsində çalışmışam, əvvəl məktəb direktoru idim, sonra Resurs Mərkəzinə rəhbərlik etdim. 21-ci əsrdə məktəblər təmirsiz olanda, onun istilik şəraiti, texniki bazası düzgün olmayanda, sizcə, dərs olar? Mən sual verirəm həmin insanlara, uzun illərdir Gürcüstanda hakimiyyətdə olublar, bizim bölgəmizi idarə ediblər və yaxud illərlə parlamentdə oturublar, bu problemi görmürdülər? Yox idi bu problem? Marneulinin 1 nömrəli tarixi məktəbi uçurdu, hər səhər uşaqların başına gəc tökülürdü. Bu gün 2 milyondan artıq maliyyə ayrılıb, həmin məktəb uçurulub, yerində gözəl bir məktəb tikiləcək. Bəs, bunlar 25 ildə hardaydı?

- Amma bizim təhsil sahəsində digər problemlər də mövcuddur, xüsusən kadr çatışmazlılğı, dərslik problemləri, dərsliklərdə yol verilən tərcümə xətaları və s...

- Bəli, kitablarla bağlı, xüsusən tərcümələrdə problemlər var. Onu biz də bilirik, və üzərində böyük mütəxəssis qrupu işləyir. Təhsil Nazirliyi ilə bu məsələlərlə bağlı çox söhbətlərimiz olub. Yaxın zamanda bu problemlər aradan qalxacaq. Onu da deyim ki, 2012-ci ilə qədər Marneulinini əksər məktəblərində kitab çatışmazlığı var idi. Bir valideyn kitab almaq üçün 150-200 lari xərcləməli olurdu. 3-4 uşaqlı ailələr nə etməliydi?! Mən Marneulidəki 2 və 3 nömrəli məktəblərin direktoru olanda kitab çatışmazlığını özüm gördüm. Valideyn uşaqlarına kitab ala bilmirdi. 5-10 faiz imkanlı adamlar alırdı. Valideyn kitab almayanda da, təbii ki, uşaq oxumurdu. Bəs bu məsələ həmin dönəmdə niyə qalxmırdı? Düz deyirsiniz, problemimiz var, amma bunun həlli yolları da var. Məsələn, həmin ailələr bu gün pulsuz kitab alır. 2013-cü ildən bu yana dövlət bütün kitabları pulsuz edib. Keçən il, sağ olsunlar, Azərbaycan hökuməti ilə Gürcüstan hökumətinin arasındakı razılaşma əsasında 7100 ədəd Azərbaycan dili və ədəbiyyatı kitabı verildi. Artıq bu yöndə problemimiz yoxdur. Mən Marneuli Resurs Mərkəzinin rəhbəri kimi Bolnisi, Dmanisi, Qardaban və s. rayonlardakı məktəblərlə də maraqlanırdım. Son iki ildə bütün məktəblərdə uşaqlar kompüterlə təmin olundu. 
Kadr məsələsinə gəldikdə, təbii ki, bu sahədə problem var. Müəllimlərin böyük əksəriyyətinin yaşı 60-dan yuxarıdır. Sadəcə olaraq, düşünməliyik ki, biz zamanında, Sovet dağılandan sonra bunun qarşısını almaq üçün nə etdik? Heç bir şey. Kadr necə yetişməlidir? İnsan ali məktəbi bitirir, mütəxəssis yanında işləyir, təcrübə qazanır və kadr olur. İnstitutu bitirən gənc kadr deyil. Biz institutu bitirən cavanları işə götürdükmü? Son 3 ildə şəhərdə və kəndlərdə ən azı 30-40 müəllim işə qəbul etmişəm. Direktorlarla həmişə bu barədə müzakirə aparmışam ki, gənclərə üstünlük verin. Yəni son illər biz tendensiyanı başlatmışıq. Odur ki, bu kadr çatışmalığı problemini o qədər də faciəvi görmürəm. Amma bunun üzərində çalışmalıyıq. Bu, bizim işimizdir, borcumuzdur. Dövlət bizə heç vaxt demədi ki, siz bunu işə götürməyin, onu götürün və s. Sadəcə məktəb administrasiyamızda səhvlik var. Kadr çatışmazlığı burdan qaynaqlanır. Orda mütəxəssis, menecer olmalıdır. Elə kəndlərimiz var ki, məktəbə çayxana kimi baxır. Bunu kim edir? Biz edirik. Dövlət etmir. Və bizim deputatlarımız, bizim məmurlarımız o məktəbə nə qədər qayğı və diqqətlə yanaşır? Təbii ki, yetərli diqqət yoxdur. Üstəlik, bir dili yaşatmaq üçün onun ədəbiyyatını yüksəyə qaldırmaq lazımdır. O dildə şeirlər səslənməli, əsərlər oxunmalıdır. Amma bu sahədə də ciddi problemlər mövcuddur. Belə olduğu halda isə, hər birimiz bu problemlərin həlli ilə bağlı düşünməliyik.

Ayxan İLDIRIMTÜRK
Bakı-Marneuli-Bakı 


Oxşar Xəbərlər

Gürcüstanda azərbaycanlıların seçki davası - Xüsusi təyinatlılar hadisə yerinə belə gətirildi (VİDEO)
“Gürcüstanda ən azı 8-9 nəfər azərbaycanlı deputat seçmək imkanımız var”
Marneulidə əməliyyat kecirilib-Həbs olunanlar var
Gürcüstanda parlamentə təkrar seçkilərin vaxtı bilindi

Xəbər lenti

PRİZMA

Yeni Azərbaycan Partiyası: Tarixi gerçəklikdən milli ideala doğru
Yeni Azərbaycan Partiyası: Tarixi gerçəklikdən milli ideala doğru

MÜSAHİBƏ

TƏHLİL

Qarabağın qədim mədəniyyət mərkəzindən Qafqazın Xirosimasınadək
Qarabağın qədim mədəniyyət mərkəzindən Qafqazın Xirosimasınadək

SOSİAL