Deputat Fazil Mustafa Türkiyənin Cümhuriyyət günü ilə bağlı təbriklərini çatdırdıqdan sonra qeyd etdi ki, hər zaman Azərbaycanın yanında olan qardaş ölkənin bəzi milli bayramlarının da təqvimlərimizdə bayram kimi əks olunmasını təklif etdi.
Daha sonra F.Mustafa şəhid ailələri ilə bağlı narahatlıq doğuran bir problemə diqqət çəkdi. “Bir çox şəhid ailələri var ki, ata-anaları rəhmətə gedib, amma şəhidlərimizin bacı-qardaşları var. Bu gün mənzil, 500 manatlıq müavinət onlara şamil edilmir. Həmin şəhid ailələri çox deyil”, deyən F.Mustafa həmin şəxslərin də güzəştli kateqoriyaya aid edilməsini zəruri saydı.
Deputat Əli Məsimli də Türkiyənin Cümhuriyyət günü ilə bağlı ürək sözlərini ifadə etdi. Spiker Sahibə Qafarovanın bu, əlamətdar günlə bağlı təbrik məktubuna diqqət çəkən deputat təbrik mətnində əksini tapan ürək sözlərini bölüşdü. Bildirdi ki, Füzuli hava limanının açılışında Türkiyə prezidentinin iştirakı iki qardaş ölkənin əməkdaşlığı, işbirliyi üçün əlavə imkanlar yaradacaq. Ə.Məsimli qeyd etdi ki, Qarabağın bərpasına on milyardlarla manat vəsait qoyulacaq. Bu il 2,2 milyard manat ayrılıb, gələn il də bir o qədər vəsait xərclənəcək. Bu da əlavə iş yerlərinin açılmasını stimullaşdıracaq. “250 manatdan 1700 manatadək maaşı olan iş yerlərinin elanları verilib. Çalışmaq lazımdır ki, orda daha yüksək maaşlı iş yerləri olsun”, deputat bildirdi.
Deputat Elman Nəsirov da qeyd etdi ki, Vətən Müharibəsində Türkiyənin Azərbaycana çox böyük dəstəyi oldu, ona görə də dövlətimiz və millətimiz Türkiyəyə minnətdardır: “Müharibədən sonra da Türkiyə bizim yanımızdadır, biz bir yerdəyik”. E.Nəsirov Türkiyə Prezidenti R.T.Ərdoğanın Füzuliyə səfərinin, açılış və təməlqoyma proseslərində iştirakının mühüm hadisə olduğunu söylədi: “Heç kim bizim birliyimizə və müttəfiqliyimizə xələl gətirə bilməz”.