Xəbər verdiyimiz kimi, I Qarabağ Müharibəsi zamanı 1993-cü il dekabrın 30-dan 31-nə keçən gecə Ağcabədi istiqamətində keçirilməsi planlaşdırılan, lakin 1 gün gecikmə ilə baş tutan və uğursuzluqla nəticələnən “Çeildağ” əməliyyatının detalları üzə çıxıb. Respublika Hərbi Prokurorluğunun sabiq Xüsusilə Mühüm İşlər üzrə böyük müstəntiqi Kamal Əliyevin cinayət işinin istintaqı barədə KİV-ə təqdim etdiyi arayışda göstərilib ki, həmin vaxt Silahlı Qüvvələrin sabiq Baş Qərargah rəisi Nəcməddin Sadıkovun əmri ilə əməliyyat bir gün təxirə salınıb. Nəticədə 82 azərbaycanlı hərbçi tələyə salınaraq öldürülüb və ya itkin düşüb.
Sozcu.info xəbər verir ki, manset.az sabiq Baş Qərargah rəisi, general-polkovnik Nəcməddin Sadıkovla əlaqə saxlayıb. N. Sadıkov haqqında yazılanlardan xəbərdar olduğunu bildirib və məsələyə münasibət bildirməkdən imtina edib:
“Mən hal-hazırda çox məşğulam. Haqqımda yazılanları oxumuşam, xəbərim var. Hazırda bu barədə danışa bilmirəm. Üzr istəyirəm, məni narahat etməyin!”
Qeyd edək ki, məlumat dünəndən xəbər portallarında yayıldıqdan sonra sosial şəbəkələrdə ciddi müzakirə mövzusuna çevrilib.