"Titan TM Qrup” Məhdud Məsuliyyətli Cəmiyyətinin rəhbərinin ölkədən çıxışına qadağa qoyulub. Buna səbəb MMC rəhbərinin vergiyə olan borcunu ödəməməsidir.
Sozcu.info xəbər verir ki, şirkət rəhbərinin İşsizlikdən Sığorta Fonduna, İcbari Tibbi Sığorta Fonduna, Dövlət Sosial Müdafiə Fonduna və dövlət büdcəsinə 6 min manata yaxın borcu var.
Buna görə də MMC-nin rəhbəri İlham Baxşıyevin ölkədən çıxışı məhdudlaşdırılıb. Həmçinin İlham Baxşıyevin rəhbəri olduğu “FERGAN CONSTRAKSEN” MMC-nin də dövlətə 8 min manata yaxın borcu var.
“Titan TM Group” MMC ilə bağlı ilginc məqam qeydiyyat ünvanıdır. MMC-nin qeydiyat ünvanı Nizami rayonu, Yavər Səfərov ev 28, mənzil 28 olaraq qeyd edilir. Bu ünvanda isə “Titan TM Group”dan başqa 26 şirkət qeydiyyatdadır.
“Titan TM Group” da daxil olmaqla bu şirkətlərin hamısı 2020-ci ilin iyul və avqust aylarında yaradılıb.
Digər maraqlı məqam isə bu şirkətlərin yaradılan kimi rəsmi qurumların tenderlərində qalib olmasıdır. Bu şirkətlərin heç birinin fəaliyyəti haqda internet resurslarında məlumat yer almır. Yalnız bu siyahıya daxil olan “Disked Qrup” MMC-nin “Azərişıq” ASC-dən 97 000 manatlıq tender udması barədə məlumat tapmaq mümkündür.