İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidməti “SOCAR Petroleum” Qapalı Səhimdar Cəmiyyətinə (QSC) qarşı məhkəmə iddiası qaldırıb.
Sozcu.info Yeniavaz.com-a istinadən  xəbər verir ki, məhkəmə baxışı bu gün - 13.04.2021-ci il tarixində Bakı Kommersiya Məhkəməsində hakim Aytən Əliyevanın sədrliyi ilə keçiriləcək.
Nazirliyin “SOCAR Petroleum” QSC-ni hansı səbəbdən məhkəməyə verdiyi açıqlanmayıb.
Məlumat üçün bildirək ki, nizamnamə kapitalı 83 milyon 760 min 900 manat olan “SOCAR Petroleum” QSC 2008-ci ildə təsis olunub. QSC-nin səhimlərinin 51%-i SOCAR-a, 49%-i isə ABŞ-ın “A.P. İnternational LLC.” şirkətinə məxsusdur.
“SOCAR Petroleum” QSC-nin əsas fəaliyyəti Azərbaycan ərazisində neft məhsullarının alqı-satqısının təşkil edilməsilə bağlıdır. Açıqlanan rəsmi məlumata görə hazırda şirkətin ölkə ərazisində 33 yanacaqdoldurma məntəqəsi, 11 neft məhsullarının saxlama terminalı və 1 STQ terminalı fəaliyyət göstərir.