Dekabrın 3-də Baş nazir Əli Əsədov Milli Məclisdə büdcə zərfinin qəbulu ilə bağlı çıxışında bildirib ki, indiyə qədər Azərbaycanda vaksinasiyaya 433 milyon manat vəsait xərclənib.
Qeyd edək ki, ölkədə vurulan vaksinlərin ümumi sayı 10 894 080, 1-ci doza vaksin olunanlar 5 120 575, 2-ci doza vaksin olunanlar 4 617 228, buster (3-cü doza) doza vaksin olunanlar isə 1 156 277 nəfərdir.
İcbari Tibbi Sığorta Agentiliyinin ictimaiyyətlə əlaqələr şöbəsindən Sozcu.info"-ya bildirildi ki, hazırda Azərbaycanda 4 istehsalçı ölkənin vaksini tətbiq olunur: "Bunlar “CoronaVac” (Çin), “AstraZeneca/Vaxzevria” (İngiltərə), “Biontech/Pfizer” (Almaniya/ABŞ) və “Sputnik V” (Rusiya) peyvəndləridir. İndiyə qədər ölkəyə 14 092 460 doza vaksin gətirilib ki, bu, ümumi alınmış peyvəndlərin 76 faizini təşkil edir. Eyni zamanda təsdiq olunmuş müqaviləyə əsasən, əlavə olaraq 4 431 000 doza vaksinin ölkəyə idxalı nəzərdə tutulur. Gələn il bu istiqamətdə müqavilələrin imzalanması istisna olunmur".
Agentliyin məlumatında qeyd olunur ki, ümumilikdə Azərbaycana 13 milyon doza “CoronaVac” vaksini gətirilib: "Əlavə olaraq isə 4 milyon doza “CoronaVac” peyvəndinin idxalı nəzərdə tutulub. Eyni zamanda Çin Xalq Respublikası tərəfindən humanitar yardım kimi Azərbaycana 150 000 doza “CoronaVac” dərman vasitəsi göndərilib. Azərbaycan Respublikası tərəfindən isə humanitar yardım kimi 100 000 doza “CoronaVac” vaksini Türk Dövlətləri Təşkilatı vasitəsilə Afrika ölkələrinə göndərilib.
İndiyə qədər ölkəyə ümumilikdə 453 600 doza “AztraZeneca” vaksini gətirilib. Azərbaycan isə humanitar yardım olaraq 170 000 doza “AstraZeneca” vaksini Özbəkistan, Bosniya və Herseqovina, Tacikistan və Qırğızıstana göndərilib. Azərbaycana indiyədək 418 860 doza “Pfizer” vaksini gətirilib. Eyni zamanda cari ilin dekabr ayının sonuna qədər, 351 000 doza “Pfizer” dərman vasitəsinin ölkəyə idxalı nəzərdə tutulub. İndiyə qədər ölkəyə gətirilən "Sputnik V" vaksini 220 000 doza təşkil edib. Əlavə olaraq, 80 000 doza “Sputnik V” dərman vasitəsinin Azərbaycana idxalı nəzərdə tutulub".
Vaksinlərin hansı qiymətdən alınmasıyla bağlı suala isə Agentlikdən cavab olaraq bildirildi ki, şirkətlərlə bağlanılan müqavilənin şərtlərinə uyğun olaraq vəsaitin açıqlanması qarşı tərəfin səlahiyyətindədir.
Vaksin istehsalçıları isə bu qiymətləri ictimaiyyətdən gizli saxlayırlar. Çünki vaksinin satış qiyməti standart rəqəmlər əsasında deyil, şirkətlərin dövlətlərlə razılaşdığı müqavilələr əsasında müəyyənləşir. Yəni şirkətlər eyni vaksini ölkələrə müxtəlif şərtlərlə və qiymətə təklif etdiklərinə görə, bu müqavilələrin gizli qalmasında maraqlıdırlar.
Lakin xarici saytların və ekspertlərin araşdırmalarına əsasən, vaksin qiymətlərini müəyyən qədər təxmin etmək mümkündür.
Xatırladaq ki, son vaxtlar vaksin bazarındakı qiymətlərdə ucuzlaşma müşahidə olunur. Ekspertlər bunun səbəbini yeni vaksinlərin bazara daxil olmasıyla əlaqələndirirlər. Hazırda bazarda ən ucuz vaksin “Astra-Zeneca” hesab olunur ki, onun bir dozası 2 dollardan təklif olunur. “Sputnik V” vaksinin qiyməti isə 6-7 dollar aralığında dəyişir. Cari ildə 25 milyard dollardan artıq qazanc əldə edən “Pfizer” vaksininin qiyməti 14 dollardır. Ölkəmizdə və dünyada ən çox satış edən “CoronoVac” vaksininin bir dozasının dəyəri isə 7-8 dollar təşkil edir.