Dövlət sərhədindən qanunsuz olaraq Azərbayana keçmək istəyən iki Gürcüstan vətəndaşının Bakıda məhkəməsi keçirilib. Məlum olub ki, həmin şəxslər Gürcüstanda polis tərəfindən axtarışda olublar.
Sozcu.info xəbər verir ki, Gürcüstan vətəndaşları 1999-cu il təvəllüdlü Levan Xidaşeli və 1997-ci il təvəllüdlü Davit Davitaşvili Georgeviç Balakən Rayon Məhkəməsində hakim önünə çıxarılıb.
Məlum olub ki, hər iki şəxsə qarşı Cinayət Məcəlləsinin 318.2-ci (dövlət sərhədini qanunsuz olaraq keçmə; qabaqcadan əlbir olan bir qrup şəxs və ya mütəşəkkil dəstə tərəfindən törədildikdə) maddəsi ilə ittiham elan edilib.
Cinayət işi materiallarında göstərilir ki, onlar qabaqcadan əlbir olan bir qrup şəxs halında COVİD-19 pandemiyası səbəbindən sərhəd-buraxılış məntəqələri bağlı olduğundan qanunla müəyyən edilmiş qaydada dövlət sərhədindən keçə bilmədikləri üçün Azərbaycana qanunsuz yolla keçmək istəyiblər.
Bu məqsədlə onlar gizli yolla Dövlət Sərhəd Xidmətinin N nömrəli hərbi hissəsinin Balakən rayonu ərazisində yerləşən sərhəd zastavasının xidməti ərazisinə yaxınlaşıblar. Sərhədi pozan zaman hərbiçilərimiz tərəfindən saxlanılıblar.
Levan Xidaşeli dindirilən zaman özünü təqsirli bilərək deyib ki, Gürcüstanda polis əməkdaşları tərəfindən təqib ediliblər. Karantin rejimi ilə bağlı sərhədlərin bağlı olması səbəbindən Azərbaycana qanuni yolla dövlət sərhədini keçməklə gələ bilmədikləri üçün bu addımı atıblar.
O, əməlindən çox peşman olduğunu, xəstə olduğunu deyib və yüngül cəza təyin edilməsini xahiş edib.
Davit Davitaşvili Georgeviç də eyni məzmunlu ifadə verib və yüngül cəza verilməsini istəyib.
Məhkəmənin hökmü ilə hər iki şəxs 1 il 6 ay müddətinə azadlıqdan məhrum edilib. Onlar cəzalarını çəkdikdən sonra məcburi şəkildə ölkə hüdudlarından çıxarılacaqlar.