“Təklif olunsa, qəbul edərəm, amma mənim də şərtlərim var...”

TƏBİB sədri Ramin Bayramlının istefa verməsi, ardınca onun səlahiyyətlərinin müvəqqəti olaraq Vüqar Qurbanova həvalə olunması günlərdi ki, ictimaiyyət arasında geniş müzakirələrə səbəb olub. Xüsusilə də, Ramin Bayramlı haqqında müxtəlif fikirlər səsləndirilir. Kimi onun öz işinin öhdəsindən gələ bilmədiyini deyir, kimi də bildirir ki, Ramin Bayramlı bəlkə də ən yaxşı kadr idi. İddia edirlər ki,  hansısa qruplar onunla bağlı böyük oyunlar qurdular... Bununla belə, TƏBİB-in İdarə Heyətinin sədri vəzifəsinə kimin təyin olunacağı məsələsi hər kəsə maraqlıdır. Rəhbər dəyişikliyi TƏBİB-də nələri dəyişəcək? Tanınmış həkimlərin nəzəri namizədi varmı? Bu və digər suallarla bağlı tanınmış həkimlərin fikirlərini öyrəndik.  
Qeyd etmək yerinə düşər ki, təkcə TƏBİB sədri deyil, səhiyyə naziri postuna da hələ ki  təyinat olmayıb. Səhiyyə nazirinin vəzifələrini hazırda müvəqqəti icra etmək səlahiyyəti Teymur Musayevə tapşırılıb. Beləliklə, iki böyük səhiyyə qurumunda rəhbər vəzifəsi boş qalıb.  
Bir müddət öncə Səhiyyə naziri postuna öz namizədliyini çəkinmədən irəli sürən Azərbaycan Həkimləri İctimai Birlyinin təsisçilərindən biri, həkim-radioloq Aydın Əliyev mövzu ilə bağlı Musavat.com-a danışıb:

“İlk olaraq Ramin Bayramlının istefası səbəbinə münasibət bildirim. Birmənalı şəkildə o adam işinin öhdəsindən gələ bilmədi. Ona dövlət rəhbərliyi tərəfindən göstərilən etimadı doğrultmadı. Qalan söhbətlərin hamısı bəhanədir. Mənim bu vəzifədə gözüm yoxdur. Kim bu vəzifəyə layiqdir, onu da deyə bilmərəm. Kim olacaqsa, biz onun fəaliyyətinə baxacağıq. Yaxşı işləyəcəksə dəstək verəcəyik, pis fəaliyyət göstərəcək, əvvəlkindən də artıq tənqid edəcəyik. Bizə lazımdır ki, xalqa kömək edən, xalqın dərdiylə yaşayan insan olsun.  O ki qaldı rəhbər dəyişərsə TƏBİB-də nələrin dəyişəcəyinə, orada çox dəyişikliklər olmalıdır. Hazırda İcbari Tibbi Sığorta sıfır vəziyyətindədir. İnsanlar bilmir ki, hara müraciət etsinlər. Faktiki olaraq icbari sığorta bütün ölkədə tətbiq olunub, hər bir insan normal vəziyyətdə poliklinikaya yaxınlaşmalıdır, öz həkimi ilə danışmalıdır. Lazım olsa orada müalicə almalı, lazım olsa başqa xəstəxanaya göndəriş verilib göndərilməlidir. Amma insanlar bundan məlumatsızdır. Sanki səhiyyə məmurlarına bu sərf edir. Maarifləndirmə işi çox zəifdir. İnsanlar öz tibbi hüquqlarını bilmirlər”.
A.Əliyev, “sizə TƏBİB sədrinin vəzifəsi həvalə olunsaydı, qəbul edərdinizmi” sualına belə cavab verib: “Təklif olunsa qəbul edərəm, amma mənim də şərtlərim var. Heç kimdən pul almayacam, heç kimə də pul verməyəcəm. Kimsə xahiş edəcək, bunların heç biri qəbul olunmayacaq. Tam, düzgün, qaydasında iş gedəcək.  Bunu qəbul edərlərsə, biz də qəbul edərik. Yoxsa, özümüzü niyə biabır edirik ki?!”

Tibb üzrə fəlsəfə doktoru, infeksionist Vüqar Cavadzadə isə mövzu ilə bağlı  Musavat.com-a aşağıdakıları bildirib: “Mən millət vəkilimiz Rəşad Mahmudovu bu yerə namizəd kimi görürəm. Pandemiya başlayandan aktiv iştirak edib. Xarici ölkələrdə də kurslar keçib. Dövlətin mənafeyini qoruyur. İnsani keyfiyyətləri, müsbət xüsusiyyətləri çoxdur. Ümumiyyətlə, ilk olaraq işi bilən adamları TƏBİB-in ayrı-ayrı bölmələrinə, xəstəxanalarına təyin etməlidirlər ki, işi apara bilsinlər.  Yoxsa dostluğa, tanışlığa əsasən gətirib yerləşdirirlər, həmin adamlar da işin öhdəsindən gələ bilmirlər. Ona görə işi bilən,  işinin peşəkarı, mütəxəssislər iş başında olmalıdır. Vicdanla xalqa xidmət etmək lazımdır. Kadr məsələsi böyük rol oynayır. Dostlarını, tanışlarını  xəstəxanalarda yerləşdirirlər, COVİD pasportlarını satmağa başlayırlar. Yaxud da başqa qanunsuz işlər həyata keçirirlər. O qanunsuz işləri edən insanlar bilirlər ki, TƏBİB-də onları himayə edən insanlar var. Ona görə ürəklə o işi edirlər. Tək TƏBİB-də deyil, xəstəxanalarda da işini bilən, təmiz insanları cəlb etmək lazımdır ki, səhiyyə sistemi dirçəlsin. Yoxsa, qanunsuzluq etdikərinə görə nə qədər həkim tutuldu. Prezident onlara etimad göstərdi, onlarsa bir il ərzində nə qədər qanunsuzluğa yol verdilər. O baxımdan, Rəşad müəllimi yaxşı tanıyıram. Bilirəm ki, təmiz insandır. Bilirəm ki, o, bu cür çirkin oyunlara heç vaxt getməz”.

İnfeksionst-hepatoloq Mərdan Əliyev də bu mövzu ilə bağlı fikir bildirib: “Mövzu siyasi olduğuna görə açığını desəm, bu mövzuya cavab vermək istəməzdim. Yalnız bunu deyə bilərəm ki, hazırda Vüqar Qurbanov TƏBİB sədrinin səlahiyyətlərini icra edir. Əvvəllər o, bu Agentlikdə Tibbi iddialar departamentinin rəhbəri idi. Yaxşı işləyirdi. Bəlkə də TƏBİB sədri o olacaq. Yəni, bu ehtimal daha çoxdur. Ola bilər ki, TƏBİB-də müəyyən qədər dəyişikliklər olsun. Amma çox böyük dəyişikliklər də gözləməməliyik. Çünki TƏBİB İcbari Tibbi Sığorta üzrə Dövlət Agentliyinə tabedir, o qurumun alt qurumudur, elə bir səlahiyyəti də yoxdur. Burada əsas işlər Agentlikdədir. İdarə edən də o qurumdur. TƏBİB sədrinin kiminsə olacağı ilə böyük dəyişiklikləri gözləməyə dəyməz”.