Kəbə Evinə niyə hər kəs buraxılmır?

Kəbə Evinə niyə hər kəs buraxılmır?

Qurban bayramı günlərində dərc etdiyimiz yazılardan birində Kəbə Evinin qapılarının necə açılmasını təsvir edən video-görüntülər təqdim etmişdik. Həmin yazıda qeyd etdiyimiz kimi bu  müqəddəs və möcüzəvi məkana yalnız xüsusi imtiyazlı şəxslərin, dövlət başçılarının və s. buraxılması hər kəsdə təbii bir sual oyadır: görəsən, Kəbənin içində nə vardır? Nədən bu müqəddəs məkanın daxilinə yalnız xüsusi ali qonaqlar buraxılır? Bunu hətta müsəlmanlara qarşı ayrı-seçkilik kimi dəyərləndirənlər  də tapılır. 

Əslində   hamının Kəbəyə buraxılmamasının elə bir xüsusi səbəbi yoxdur. Əvvəla, bu məkana hər kəsin buraxılması milyonlarla insanın axışdığı Məkkədə ciddi  problemlər yaradar. Odur ki, buraya yalnız xüsusi imtiyazlı şəxslər buraxılır. Bu xüsus həm də Kəbə Evinin müqəddəsliyini, dəyərini artıran amillərdəndir. 

Bəs Kəbənin içində nə var?


Kəbənin içərisi Türkiyədə çap edilmiş İslam ensiklopediyasında belə təsvir edilir: "İçi dördguşəli bir otaq görünüşündə olan Kəbənin Ruknu-l-İraqi guşəsinə - dama çıxmaq üçün pilləkən və qabağında "tövbə qapısı" adlandırılan bir qapı var. Döşəmə mərmərdəndir. Divarlar 2 metr hündürlüyə qədər mərmərlə döşənib.

Kəbədə aparılan təmir və tikinti işləri ilə əlaqədar olaraq qərb tərəfdəki divara 5, şərq və şimal divarlarına isə 1 kitabə yerləşdirilib. Döşəmənin ortasında Abdulla ibn Zübeyr dövründən qalma cənub-şimal istiqamətində düzülmüş 3 taxta dirək və bunlardan qapının qabağındakının qabağında qərb divarına tərəf Həzrəti Peyğəmbərin(s) namaz qıldığı yer var. Bura səccadə (canamaz) formasında bir mərmərlə işlənib ki, nəzərə çarpsın.


Tavan və divarlar yuxarıdan mərmər üzlüklərə enən qırmızı atlasdan hazırlanmış bir pərdə ilə örtülüb. Tavan ilə damın arasında 1,33 metrlik bir məsafə var". (MƏNBƏ: Sadettin Ünal, "Kəbe (Kəbə)", Diyanet İslam Ansiklopedisi, 24-cü cild, səhifə 15, türk dilində). Göründüyü kimi, Kəbənin içində  gizli bir nəsnə yoxdur...

Kəbə Evinin açarlarını kim saxlayır?

Mövzumuz üçün diqqətəlayiq məsələlərdən biri də Kəbə Evinin açarlarının kimlərə etibar edilməsidir. Əslən Həzrəti İslam Peyğəmbərinin tayfasından - Qüreyşlərdən olan Əş-Şeybi nəsli 1400 ildən artıqdır ki, Kəbənin açarlarını özlərində saxlayır və nəsildən-nəslə keçirirlər. Kəbənin açarlarını saxlayan Əş-Şeybi ailəsinin icazəsi olmadan Allah Evinin qapıları açılmır. Yalnız bu ailənin icazəsi ilə müsəlman olan dövlət adamlarının Məkkəyə səfərində və ildə iki dəfə təmizlik üçün Kəbə Evinin qapıları açılır. 
Ərəbistan liderləri də Kəbəyə yalnız bu ailənin icazəsi ilə daxil olur...



Bu günədək bütün Ərəbistan dövlət başçıları da yalnız Əş-Şeybi ailəsinin icazəsi ilə Kəbəyə daxil olur. Kəbənin sirlərindən biri də məhz bu açarla bağlıdır. Belə ki, açarı Əş-Şeybi ailəsindən başqa birisi əlinə aldığı təqdirdə belə müqəddəs evin qapıları açılmır. Amma Əş-Şeybi ailəsindən kiçik bir uşaq belə açarı götürsə qapı açılar. Kəbə Evinin açarının, örtüyünün, həmçinin Kəbə yaxınlığındakı İbrahim Peyğəmbərin ayaq izinin əks olunduğu daşın yer aldığı Məqami-İbrahim adlı yerin açarı da Əş-Şeybi ailəsindədir. Məhəmməd Peyğəmbər(s) zamanında Kəbənin açarının kimdə qalmasına dair gərgin müzakirələrin getməsi və Peyğəmbərin(s) bunu Əş-Şeybi ailəsinə verməsi yazılı qaynaqlarda da yer alıb. 


Müqəddəs Kəbə Evinin açarlarını saxlayan, Qüreyş qəbiləsindən Əbdüləziz Əş Şeybi 2010-cu ilin noyabr ayının 10-da - 87 yaşında dünyasını dəyişib. Bu gündən sonra keçirilən təhvil-təslim tədbirində açarlar Əbdüləziz Əş-Şeybinin qardaşı Əbdülqədir Əş-Şeybiyə verilib.

Kəbə qapıları  ildə yalnız iki dəfə açılır...



Bəzi məlumatlara görə, XX əsrin 90-cı illərinədək Kəbənin qapıları həftədə iki dəfə ziyarətçilər üçün açılırmış. Ancaq 1996-cı ildə Kəbənin ərazisi genişləndirildikdən və ziyarətçilərin sayı qat-qat artdıqdan sonra bunu etmək mümkün olmayıb. Odur ki, hazırda müqəddəs məkanın qapıları yalnız ildə iki dəfə xüsusi ziyarətçilər üçün açılır.

Sultan Laçın



Oxşar Xəbərlər

Xəbər lenti


{sape_links}{sape_article}