"Karantin qaydalarının sərtləşdirilməsi və ya yumşaldılması epidemioloji vəziyyətə bağlıdır. Bu gün dünyanın hər yerində artım dinamikası qeydə alınır. Bu, mutasiya olunan ştammlarla bağlıdır".
Bu sözləri BAKU.WS-ə tibb elmləri doktoru, professor Adil Qeybullaya bildirib.
Tibbi ekspert əlavə edib ki, Azərbaycanda da artım tendensiyası müşahidə olunur: "Tomoqrafiya üçün müraciət edənlərin və test verənlərin arasında artım var. Yəni, bu artım realdır. Lakin indiki epidemioloji durumda karantinin sərtləşdirilməsinə ehtiyac yoxdur. Artım olarsa, qaydaların sərtləşdirilməsinə ehtiyac yarana bilər.
Ötən il pandemiya dövründə Azərbaycanda 40 minə yaxın çarpayı fondu var idi. Modul tipli xəstəxanalar da bu işə cəlb olunmuşdular. Əgər yolxuma sayı çoxalarsa və bu rəqəmi aşarsa, yenə problemlər yarana bilər. İstənilən halda amblator müalicəni normal təşkil etmək lazımdır. Xəstələrin müəyyən qrupunun evdə müalicəsinin təşkil edilməsi nizama salınmalıdır. İkinci dalğa zamanı bu məsələdə müəyyən problemlərlə üzləşmişdik.
İnsanlar xəstəxanada deyil, evdə müalicəyə üstünlük vermişdilər. Burada xeyli problemlər yaranmışdı. Xeyli ağırlaşmaların yaranmasına, xəstəxanaya gec çatdırılmaya və ölüm hallarının artmasına səbəb olmuşdu. İndidən kriteriyalar müəyyənləşməlidir.
Hansı xəstələr stasionar, hansılar ambulator müalicə üçün götürülür. Ambulator müalicəyə götürülən xəsətlərin üzərində dinamik müşahidə aparılır. Belə olacağı təqdirdə əlavə problemlər yaranmayacaq".