Paytaxtın bir sıra ərazilərində xeyli əvvəl əkilmiş Eldar şamlarının quruması baş verir ki, bu da şəhər sakinlərini ciddi narahat edir. Bir müddət əvvəl Ekologiya və Təbii Sərvətlər Nazirliyi, Kənd Təsərrüfatı Nazirliyi, AMEA-nın Botanika İnstitutu və Bakı Şəhər Yaşıllaşdırma Təsərrüfatı Birliyinin, Qida Təhlükəsizlıyi Agentliyinin mütəxəssislərinin iştirakı ilə xüsusi komissiya yaradılıb.
Yenisabah.az xəbər verir ki, bu barədə Bakı Şəhər İcra Hakimiyyətinin Mətbuat Xidməti məlumat yayıb.
Komissiya müəyyən edib ki, Abşeron yarımadasında mövcud Eldar şamlarının bir hissəsi sürətlə yayılan göbələk xəstəliyinə tutulub. Bu kimi hallar təkcə ölkəmizdə deyil, qonşu Gürcüstanda da geniş şəkildə baş verib. Komissiyanın ilkin rəyinə görə, xəstəliyin başqa ağaclara keçməsinin qarşısının alınması və yaşıllıq sahələrinin qorunması üçün bu ağaclar utilizasiya edilməlidir. Ekologiya və Təbii Sərvətlər Nazirliyi artıq bu barədə qərar qəbul edilib.
Bakı Şəhər İcra Hakimiyyətində də komissiya yaradılıb və xüsusi proqram hazırlanıb. Problemin aradan qaldırılması üçün, ilk növbədə, xəstə, qurumuş ağaclar çıxarılır. Eyni zamanda, digər ağacların qorunması üçün onlar tərkibində mis olan xüsusi dərman preparatları ilə dezinfeksiya edilir.
Bakı Şəhər Yaşıllaşdırma Təsərrüfatı Birliyi digər aidiyyatı qurumlarla birgə paytaxtın bütün rayonlarında genişmiqyaslı tədbirlərin həyata keçirilməsinə başlayıb. Utilizasiya edilən ağacların yerinə əkin mövsümündə yeni ağaclar əkiləcəkdir.