"Borçalı” İctimai Birliyi Dünya Azərbaycanlılarının Həmrəyliyi Günü və Yeni il münasibətilə Azərbaycan xalqını və ölkəmizdən kənarda yaşayan soydaşlarımızı təbrik edib. Təbrikdə deyilir:

"Əziz soydaşlar!

Dünya Azərbaycanlılarının Həmrəyliyi Günü ayrı-ayrı ölkələrdə yaşayan azərbaycanlılarla əlaqələr qurmaq, onlar arasında birlik və həmrəylik yaratmaq işində mühüm rol oynayır. Təsadüfi deyil ki, bu günü dünyanın 70-dən çox ölkəsində yaşayan azərbaycanlılar bayram kimi qeyd edir.

Dünya Azərbaycanlılarının Həmrəyliyi Gününün qeyd edilməsi artıq bütün dünya azərbaycanlıları üçün zərurətə və mənəvi ehtiyaca çevrilib. Azərbaycanlıların yaşadıqları, fəaliyyət göstərdikləri və çoxluq təşkil etdikləri ölkələrdə bu tendensiya özünü yüksək səviyyədə göstərir. Dünya Azərbaycanlılarının Həmrəyliyi Gününü hətta milliyyətcə azərbaycanlı olmayıb, lakin Azərbaycanda doğulub böyümüş, Azərbaycan əsilli diaspor nümayəndələri də qeyd edirlər.

Bəlli olduğu kimi, Dünya Azərbaycanlılarının Həmrəyliyi Gününün əsası 1989-cu il dekabrın axırlarında Naxçıvanda sərhədlərin (SSRİ-İran sərhədləri) dağılması zamanı qoyulub. Hansı ki, məhz bu hadisədən sonra - 1991-ci ilin 16 dekabrında Azərbaycan xalqınının ümummilli lideri, o vaxt Naxçıvan Muxtar Respublikası Ali Məclisinin sədri vəzifəsində çalışan Heydər Əliyev dünya azərbaycanlılarının birliyini yaratmağın əhəmiyyətini nəzərə alaraq dekabrın 31-ni Dünya Azərbaycanlılarının Həmrəyliyi Günü elan edib.

Həmin tarixdən etibarən bütün azərbaycanlılar üçün əziz olan 31 dekabr - Dünya Azərbaycanlılarının Həmrəyliyi Günü bayram edilir. Azərbaycanlılar bu gün ilə fəxr edir və onu qürurla qeyd edirlər.

Bu günün əhəmiyyətini nəzərə alaraq, Azərbaycan xalqını və ölkəmizdən kənarda yaşayan soydaşlarımızı Dünya Azərbaycanlılarının Həmrəyliyi Günü və Yeni il münasibətilə təbrik edirik. Arzu edirik ki, 2018-ci il dövlətimiz və yaşadığımızı bölgə üçün qansız-qadasız bir il olsun, ölkəmizin inkişafına daha böyük töhfələr versin.

"Borçalı” İctimia Birliyi