Gürcüstan azərbaycanlıları sərhədlərin açılması və ya quru sərhəddə alternativ giriş-çıxışın təmin olunması ilə bağlı Azərbaycan Respublikasının prezidenti İlham Əliyevə müraciət ediblər.
Sozcu.info xəbər verir ki, bu barədə 24News.ge xəbər portalına müraciətin təşəbbüskarı ictimai fəal Samirə Bayramova məlumat verib.  O bildirib ki, müraciətdə artıq üç ildir pandemiya ilə əlaqədar quru sərhədlərin bağlı olması səbəbindən insanlar maddi mənəvi əziyyətlər çəkir: "Həm dost, həm strateji dövlət olmaqdan başqa hər iki ölkəni mənəvi birləşdirən insan faktoru da var. Gürcüstanda yaşayan azərbaycanlılar və Azərbaycanda yaşayan gürcülər var. Onlar üçün quru sərhədləri açıb, giriş-çıxış üçün daha ucuz alternativi yaratmağınızı xahiş edirik. Çünki digər ölkələrin vətəndaşlarından fərqli olaraq Gürcüstan və Azərbaycanda yaşayan xalqları biri-biri ilə ailə münasibətləri və bağları birləşdirir".  Qeyd olunub ki, petisiyaya mindən çox insan imza atıb və onlar müvafiq orqanlara alternativ giriş-çıxış imkanları yaratmaq, quru sərhədi keçmək üçün güzəştlər və imkanlar yaradılmasını xahiş ediblər.