Təxminən 3 ay əvvəl, 15 sentyabr 2023-cü il tarixində Qudyalçay çayının Xaçmaz şəhərindən keçən hissəsində avtomobil körpüsü tamamilə dağıldı. Xudat şəhər və ətraf kəndlərin Xaçmaz şəhəri və Bakı istiqaməti ilə nəqliyyat əlaqəsi tam kəsildi.

Azərbaycan Avtomobil Yolları Dövlət Agentliyinin açıqlamasına görə, intensiv yağıntılar nəticəsində yaranmış güclü sel suları respublika əhəmiyyətli Gəndob-Xaçmaz-Yalama-Rusiya Federasiyası ilə dövlət sərhədi avtomobil yolunun 27-ci km-də, Qudyalçay üzərində yerləşən və 1974-cü ildə inşa edilmiş avtomobil körpüsündə çökməyə səbəb olmuşdu.

Hadisə nəticəsində “VAZ” markalı minik avtomobili çaya düşmüş və nəticədə avtomobildə olan 3 nəfər xəsarət almışdı.

Hadisə həmin gün ölkə gündəmini zəbt etdi və bundan sonra əraziyə dövlət rəsmiləri, həmçinin Avtomobil Yolları Dövlət Agentliynin İdarə heyətinin sədri Saleh Məmmədov da getdi.

Hadisə yerində jurnalistlərə açıqlama verən Saleh Məmmədov bu körpünün təxminən 50 il əvvəl tikildiyini bildirdi: “Bu körpünün dayaqlarının bünövrəsi sıvaylar üzərində qurulmayıb. O dövrün tələblərinə uyğun tikilib”.

Saleh Məmmədovun verdiyi açıqlamalar arasında ən çox maraq doğuranı körpünün bərpa müddəti ilə bağlı dediyi sözlər oldu: “Körpünü yeni tələblərə uyğun bərpa edərik. 10 gün müddətində bərpası yekunlaşar”.

Bu açıqlamadan sonra sosial şəbəkələrdə vətəndaşlar arasında “Uçan körpü necə 10 günə bərpa edilə bilər?”, “10 günə düzələn körpü hansı keyfiyyətdə olacaq?” kimi suallar yarandı.

AAYDA ötən gün, yəni, 20 dekabr tarixində məlumat yayaraq bildirdi ki, körpüdə hələ asfalt döşənməsi işləri icra olunur.

Mənbə: Bakıvaxtı.az