Gürcüstanın Baş naziri İrakli Qaribaşvili Azərbaycana səfərindən əvvəl Azərbaycan və Ermənistan arasında vasitəçi kimi çıxış etmə təklifi irəli sürüb. Buna qədər Ermənistan mina xəritələrini Azərbaycana təhvil verilməsi və əvəzində erməni məhbusların İrəvana qaytarılması da Gürcüstanın vasitəçiliyi ilə həyata keçirilib. Bəs, Azərbaycan oxşar təşəbbbüslə çıxış edərək Abxaziya və Cənubi Osetiya münaqişələrinin həlli üçün Gürcüstan və Rusiya arasında vasitəçi ola bilərmi?
“Prioritet beynəlxalq hüququn norma və prinsiplərindən irəli gələn vəzifələrin icrasıdır”. 
Bunu Sozcu.info-a açıqlamasında Sosial Təhqiqatlar Mərkəzinin baş məsləhətçisi, politoloq İlyas Hüseynov bildirib.
O xatırladıb ki, Azərbaycan bütün münaqişələrin həlli tərəfdarıdır:
“Ərazi bütövlüyü, dövlətlərin suverenliyi kimi prinsiplər bütün dünyada əsas meyar kimi götürülür. Azərbaycan da bu meyarlara sadiqdir. Çünki Azərbaycan uzun illər separatizmdən əziyyət çəkən və terror hücumlarına məruz qalmış bir dövlətdir”.
Politoloq hesab edir ki, Azərbaycan bu kimi problemləri – münaqişəli vəziyyətlərin mahiyyətini çox yaxşı anlayır və diplomatik kanallarla vasitəçilik imkanlarını hər zaman açıq qoyub:
“Üçtərəfli formatlarda səmərəli fəaliyyət bunu deməyə əsas verir. İran-Azərbaycan, Azərbaycan-Rusiya, Türkiyə-Azərbaycan-Rusiya, Türkiyə-Azərbaycan-Türkmənistan, Türkiyə-Azərbaycan-Pakistan və s. çoxsaylı formatlar vardır ki, Azərbaycan öz diplomatiyası ilə burada həlledici fəaliyyət həyata keçirir. Hesab edirəm ki, bu xüsusda Gürcüstanın da onun münaqişəli bölgələrində, yəni Abxaziya və Cənubi Osetiyada sülhün və təhlükəsizliyin təmin edilməsində rəsmi Bakı moderator olaraq fəaliyyət göstərə bilər”.
Rafi Müslümov