Rusiya prezidenti Vladimir Putinin səfərbərlik haqqında fərmanının yeddinci bəndində deyilir ki, bir milyona qədər insan orduya çağırıla bilər.

Sozcu.info xəbər verir ki, bu barədə informasiyanı “Novaya qazeta. Avropa” nəşri prezident administrasiyasındakı mənbəyə istinadən yayıb.

"Rəqəm bir neçə dəfə redaktə edilib, nəticədə bir milyonda saxlanılıb", deyə mənbə vurğulayıb. Putinin fərmanının yeddinci bəndində “rəsmi istifadə üçün” sözləri yazılıb.

Onun məzmunu ilə bağlı yeganə rəsmi məlumat ondan ibarət olub ki, orada orduya çağırıla biləcək şəxslərin sayı göstərilir. Bu barədə prezidentin mətbuat katibi Dmitri Peskov bildirib. Rusiyanın müdafiə naziri Sergey Şoyqu iddia edib ki, Putinin elan etdiyi “qismən səfərbərlik” çərçivəsində orduya 300 min nəfərin çağırılması planlaşdırılır.

Peskov fərman haqqında danışarkən müdafiə nazirinə istinad edib: “Yalnız onu deyə bilərəm ki, Sergey Kojuqetoviç Şoyqu müsahibəsində deyib:“ 300 min nəfər. Burada söhbət 300 minə qədər adamın sayından gedir”.

Nəşr həmçinin bildirib ki, Müdafiə Nazirliyi səfərbərlik haqqında prezidentin fərmanının bütün mətninin təsnifləşdirilməsini xahiş edib, lakin nəticədə yalnız yeddinci abzas “rəsmi istifadə üçün” kimi qalıb.

Bizim.media