Vətən Müharibəsindəki qələbədən sonra Prezident İlham Əliyev çıxışlarında mütəmadi olaraq həm beynəlxalq ictimaiyyətə, həm də düşmənə tarixi xatırladır. Ölkə başçısı azərbaycanlıların Qərbi Azərbaycan torpaqlarına - Zəngəzur, Göyçə, İrəvan və digər ərazilərə qayıdacağını xüsusi vurğulayır. Prezident son olaraq Xocasən qəsəbəsində şəhid ailələri və müharibə əlilləri ilə görüşündə hətta üçtərəfli sazişdə də bu məsələnin əks olunduğunu bildirib. “10 noyabr Bəyanatında bütün qaçqınların öz doğma torpaqlarına qayıtmalı olduğu göstərilir. Bizim doğma torpağımız Zəngəzurdur, Göyçə mahalıdır, İrəvandır. Biz qayıdacağıq!”,-deyə İlham Əliyev qeyd edib.
Maraqlıdır, dövlət başçısı bu bəyanatlarla kimlərə hansı mesajları vermək istəyir?  Ümumiyyətlə, bu açıqlamalardan düşmən hans nəticələr çıxarmalıdır?
Mövzu barədə fikirlərini Yenisabah.az-la bölüşən Milli Məclis deputatı, politoloq Aydın Mirzəzadə hesab edir ki, Prezident bu çıxışları ilə Azərbaycanın tarixini, suveren hüquqlarını bir daha dünya ictimaiyyətinin diqqətinə çatdırır:
“İlham Əliyev Ermənistan deyilən dövlətin süni şəkildə 100 il bundan əvvəl tarixi Azərbaycan torpaqlarında yaradılması və sonradan zaman-zaman Azərbaycan torpaqlarının Ermənistana qanunsuz verilməsi məsələsini hallandırır. Həmçinin Ermənistanın torpaqlarımızda dövlət yaratmağı azmış kimi hətta onun tarixini saxtalaşdırdığını, coğrafi adları dəyişdiyini, nəinki o torpaqları, hətta bugünkü Azərbaycanın bir hissəsini də özününkü olaraq iddia etdiyini dünya ictimaiyyətini diqqətinə çatdırır. Çünki dünyanın bunu bilməsinə, Ermənistanın bunu xatırlamasına, Ermənistanı müdafiə edən xaricdəki müəyyən dairələrin Azərbaycanın bunu unutmadığını anlamasına ehtiyac var.  Azərbaycan cənab Prezidentin mövqeyi ilə dünyaya özünün haqq işini çatdırır”.  
Millət vəkili vurğulayıb ki, Ermənistanın bu dəqiqə yerləşdiyi ərazi tarixi Azərbaycan torpaqlarıdır və bu reallıq inkar edilə bilməz:
“Ermənistan bunu unutmamalıdır ki, azərbaycanlıların orada yaşamaq, öz dədə-baba torpaqlarında gəzmək hüququ var. Ermənitanın apardığı siyasət- Azərbaycan və Türkiyə kimi iki möhtəşəm qonşu ilə münasibətləri kəskin saxlaması, Azərbaycanın təklif etdiyi sülh müqaviləsindən imtina etməsi, iqtisadi layihələrdən özünü kənara çəkməsi ilk növbədə Ermənistanın özü üçün ciddi problemlər yaradır. Amma bununla belə nə tarixin üstünü pərdə ilə örtmək, nə də azərbaycanlıların qayıtmasına qadağa qoymaq olar. Prezidentin çağırışları hər birimizin ürəyindən gələn çağırışlardır. Bizim bir insan kimi qayıtmaq hüququmuz var və qayıdacağıq. Ermənistan bilməlidir. Axı nəyə görə nəsilləri uzun illər İrəvanda, Göyçədə, Zəngəzurda yaşamış insanlar indi yurdlarına qayıda bilməsinlər? Niyə qəbirləri, min illik tarixi abidələrimizi ziyarət edə bilməsinlər?”.
Sayad HƏSƏNLİ