Ötən gün Yerevanda Ermənistanın Müdafiə naziri Arşak Karapetyanla KTMT-nin baş katibi Stanislav Zasın görüşü baş tutub. Bu zaman yeni nazir sərhəd probleminin güc yolu ilə həllindən söz açıb.
O bildirib ki, əgər Ermənistan-Azərbaycan sərhədində vəziyyət sülh yolu ilə həll olunmasa, “Yerevan güc tətbiq etmək hüququnu özündə saxlayır”.
Müharibədən sonra Azərbaycan dəfələrlə sülh sazişi təklifi etsə də, indiyədək Ermənistandan təklifə müsbət reaksiya göstərilməyib. Bununla yanaşı, üçtərəfli bəyanata əsasən, həyata keçirilməli olan delimitasiya və demarkasiyaya da maneə yaradan tərəf Ermənistandır. Bunlara azmış kimi 9 ay əvvəl üçtərəfli bəyanatı imzalayan düşmən ölkə bu gün müharibə iddiası ilə də çıxış etməkdən çəkinmir.
Ermənistan rəsmilərinin son günlərdəki radikal çıxışları nəyə hesablanıb?
Sozcu.info-a danışan ehtiyatda olan mayor Ədalət Verdiyev bildirib ki, Ermənistan tərəfi bu tip bəyanatlarla özünü beynəlxalq ictimaiyyətin gözündə daha da gülünc vəziyyətə salır:
“KTMT baş katibi ilə görüşündə Ermənistanın imkanlarını kifayət qədər yüksək dəyərləndirən Arşak Karapetyan 44 günlük müharibə zamanı 10 min kvadrat-kilometrlik ərazini qoyub qaçan erməni ordusunun rəhbər şəxslərindən biri idi. O, 2016-cı ilin aprel döyüşlərində də fəaliyyətinin qənaətbəxş olmamasına görə vəzifədən azad edilib. Sonradan isə müxtəlif vaxtlarda Paşinyanın müşaviri və Ermənistan silahlı qüvvələrinin baş qərargah rəisinin müavini olub. Belə bir vəzifəni icra edən Karapetyan niyə əlində olan imkanlardan müharibə zamanı istifadə etməyib, kapitulyasiya aktını imzaladıqdan sonra bu cür fikir səsləndirib?!”
Hərbi ekspert KTMT-nin indiyədək münaqişələrdə iştirak etməməsindən də söz açıb:
“Hərbi blok hesab olunsa da, onun heç bir döyüş təcrübəsi yoxdur, indiyədək heç bir münaqişəyə müdaxilə etməyib. Ermənistan bu quruma dönə-dönə müraciət edib və bu müraciətlərin heç biri hətta müzakirəyə belə çıxarılmayıb. Düzü, düşünmürəm ki, Ermənistan yenidən hərbi münaqişəyə başlamaq niyyətindədir. Çünki bunun üçün onların yetərli imkan və potensialları yoxdur. Amma kiçik toqquşmalar, atəşkəsin pozulması halları mümkündür və bu toqquşmaların da qarşısı qətiyyətlə alınır. Mətbuatda verilən məlumatlar yalnız rəsmi bir qurumun ictimaiyyətə açıqlayacağı tərzdə ifadə olunur, lakin bunların altında kifayət qədər ciddi fəaliyyətlər dayanır, bunu isə rəsmi qurumun açıqlaması doğru olmaz”.