“Əslində, bu təxribatların Türkiyə prezidenti Ərdoğan ilə Rusiya prezidenti Vladimir Putin arasında Soçidə keçirilən görüş ərəfəsində həyata keçirilməsi, bu görüşdə əldə olunan nətəicələrin mahiyyət etibarilə gözdən salınmasına xidmət edən qıcıqlandırıcı faktordur”.
Bu sözləri Sozcu.info -ya açıqlamasında siyasi analitik Elçin Mirzəbəyli bildirib.
O, sülhməramlıların nəzarətində olan Həsənriz kəndində (Kəlbəcər rayonu) ermənilərin qondarma rejimin “bayrağ”ını ucaltması ilə yanaşı, Ermənistan hökümətinin “DQR”-ə 13.4 milyard dram (28 milyon dollar) yardım ayırmasını şərh edib. 
Elçin Mirzəbəyli vurğulayıb ki, buna görə, ilk növbədə, sülhməramlılar məsuliyyət daşıyır:
“Azərbaycan tərəfinin hələ ki, rəsmi açıqlaması yoxdur. Məlum olduğu kimi, sülhməramlılarla bağlı çoxsaylı problemlər mütəmadi olaraq dilə gətirilir. Ola bilsin ki, son təxribat videosunun da daha öncədən çəkilməsi ehtimalı var. Bütün hallarda etnik ermənilərin məskunlaşdığı və Rusiya sülhməramlılarının müvəqqəti müşahidəsi altında olan Azərbaycan ərazilərində bu tip qanuna zidd hərəkətlər baş verirsə, buna görə məsuliyyəti sülhməramlılar daşıyır. Təbii ki, Azərbaycanın hərbi komandanlığı yəqin ki, bu məsələlərlə bağlı sülhməramlılarla müvafiq təmasa keçəcək və bu istiqamətdə müəyyən addımlar atılacaq”, – deyə mütəxəssis əlavə edib.
Politoloqun sözlərinə görə, yaxın zamanlarda Qarabağdakı monitorinq mərkəzinin fəaliyyətinin daha da güclənməsi və Türkiyənin bu proseslərdə daha aktiv rol alması gözlənilir:
“Bu gözləniləndir, həmçinin, bu təxribatları həyata keçirəcəyi ehtimal da özünü qoruyub saxlayır. Artıq Türkiyə mediası Füzuli Beynəlxalq Hava Limanının açılışı barədə məlumat yayıb və açılış mərasimində Türkiyə prezidentinin iştirakının nəzərdə tutulduğunu bildirib. Bütün bunlar bölgədə baş verən qlobal proseslərə qarşı Ermənistan tərəfinin reaksiyalarıdır və şübhəsiz, təkcə Ermənistanın yox, eyni zamanda, bölgəyə sülhün və əmin-amanlığın gəlməsini arzulamayan və uzun illərdən bəri separatçılara dəstək verən region dövlətlərinin həmin prosesdə yer alması mümkündür”.
Rafi Müslümov