Martın 16-da Azərbaycan Respublikasının Prezidenti İlham Əliyevin təşəbbüsü ilə Ankarada Türk Dövlətləri Təşkilatının Dövlət Başçılarının Fövqəladə Zirvə görüşü keçirildi.
Dövlətimizin başçısı Zirvə görüşündə əhatəli,möhtəşəm çıxışı ilə bütün dünyanın diqqət mərkəzində oldu. Çıxışının başlanğıcında ilk öncə Qardaş Türkiyə xalqına Azərbaycan xalqı adından dərin hüznlə başsağlığı verdi. Dövlətimiz tərəfindən göstərilən humanitar yardımların böyük dostluğun, qardaşlığın bariz nümunəsi olduğunu diqqətə çatdırdı.
Xatırladaq ki, Azərbaycan hökuməti və xalqı zəlzələ baş vermiş anda qardaş Türkiyəyə humanitar yardımlar etmək üçün səfərbər olmuşdur. Azərbaycandan 940 nəfər, o cümlədən xilasedicilər, tibb personalı və könüllülər zəlzələ bölgəsinə göndərilib. Türkiyəyə göndərilən xilasedicilərin sayına görə Azərbaycan dünya ölkələri arasında birinci yerdə olmuşdur. Xilasedicilərin səyi nəticəsində dağıntılar altından 53 nəfər sağ çıxarılıb. Həmçinin 780 nəfərin cəsədi dağıntılar altında aşkar edilib. Tibb personalı ümumilikdə 3 mindən çox şəxsə tibbi yardım göstərib.

Bu günə qədər 45 milyon ABŞ dollarından artıq vəsait AFAD və digər humanitar qurumların bank hesabına köçürülmüşdür. Bununla yanaşı, qardaş Türkiyəyə 5320 ton humanitar yardım çatdırılmışdır.

İki qardaş ölkə hər zaman həm sevincli, həm də kədərli günündə bir-birinin yanında olmuşlar. Bu sözlərin davamı olaraq diqqəti 44 günlük müharibəyə yönəldən İlham Əliyev qeyd etdi ki, 2020-ci ildə İkinci Qarabağ müharibəsində ilk saatlardan başlayaraq son günə qədər Azərbaycana göstərdiyi siyasi və mənəvi dəstək bizə əlavə güc verdi.

2021-ci ildə Qarabağın tacı olan Şuşa şəhərində Türkiyə ilə Azərbaycan arasında Şuşa Bəyannaməsi imzalanmışdır və bizim əlaqələrimiz rəsmən müttəfiqlik səviyyəsinə qaldırılmışdır.

Ermənistanın Azərbaycana qarşı işğalçılıq siyasətindən söz açan cənab Prezident İlham Əliyev Azərbaycanın dünyada mina ilə ən çox çirkləndirilməsi ölkələr sırasında olduğunu bildirdi. Ermənistan 2020-ci də noyabrın 10-da imzalanmış Bəyanatı kobudcasına pozduğunu və bunun üçün məsuliyyət daşıdığını qeyd etdi. Biz Ermənistan tərəfindən dağıdılmış böyük ərazilərə həyatı yenidən qaytarmaq üçün əlimizdən gələni edirik. Keçmiş məcburi köçkünlərin öz doğma yurdlarına dönüşü üçün “Böyük Qayıdış” proqramının icrasına başlamışıq. Yenidənqurma prosesində Türkiyə şirkətləri podratçı kimi bir çox infrastruktur layihələrində fəal iştirak edirlər.

Füzuli rayonunda Özbəkistan tərəfindən tikilən məktəbə və Qazaxıstan tərəfindən inşa edilən yaradıcılıq mərkəzinə görə minnətdarlıq bildirən İlham Əliyev bəyan etdi ki, türk dünyası təkcə türk dövlətlərinin sərhədlərindən ibarət deyil.

50 milyondan çox olan azərbaycanlıların yalnız 10 milyonu Azərbaycan ərazisində yaşayır. Tarixi torpaqlarımız olan Qərbi Zəngəzurdan 1920-ci ildə sovet hökumətinin qərarı ilə Azərbaycandan ayrılıb Ermənistana verilməsinə görə Türk dünyası coğrafi cəhətdən ayrılmasına səbəb olmuşdur. Bu ərazilərdən zorla qovulan qərbi azərbaycanlılar indi Qərbi Azərbaycan İcmasında birləşmişlər. Qayıdış Konsepsiyasına görə həmin vətəndaşların öz yurdlarına qayıdışı üçün müvafiq verifikasiya və zəmanət mexanizmi olan hüquqi baxımından məcburi olan beynəlxalq razılaşma əldə edilməlidir. Ermənistanla qarşılıqlı prinsip əsasında Qarabağda yaşayan ermənilərin  hüquqlarının qorunacağına zəmanət verərək qarşılıqlı razılaşma əldə olunacağına inanıram.

Bütün çıxışı boyu böyük inamla, qürur hissi ilə nitq söyləyən cənab Ali Baş Komandan İlham Əliyev bir daha bütün türk dünyasına bəyan etdi ki, türk dünyası hər zaman eyni dildən, eyni dindən, eyni yoldan ibarət bir birlikdir.

Dadaş Babazadə

Suraxanı rayonu, 89 nömrəli tam orta məktəbin direktoru

Sozcu.info