İmtina cavabı verilən Bakı sakini ona qarşı haqsızlıq edildiyini bildirir, nazirlik isə susur…
Əmək və Əhalinin Sosial Müdafiəsi Nazirinin diqqətinə: ƏƏSMN sözçüsü Fazil Talıblı mətbuata cavab vermirsə, bəs, nə işlə məşğuldur?…
Aprel, may aylarında 600 min işsiz vətəndaşa 190 manat birdəfəlik vəsait ödənilərkən vətəndaşlar arasında Əmək və Əhalinin Sosial müdafiəsi Nazirliyindən (ƏƏSMN) çoxlu sayda şikayətlər olduğu hər kəsə bəllidir. Təəssüf ki, hələ də haqqı çatmasına rəğmən, birdəfəlik ödəməni ala bilməyən kifayət qədər narazı vətəndaş var. Doğrudur, burada bir sıra obyektiv problemlıər var. Məsələn, Dövlət Statistika Komitəsinin açıqladığı kimi, işsizlərin sayı ölkədə 297,8 min deyil, 1 milyondan çoxdur.
Buna baxmayaraq, işsiz kimi birdəfəlik ödəmə almaq üçün müraciət edən vətəndaşlara Əmək və Əhalinin Sosial Müdafiəsi Nazirliyi “aztəminatlılıq meyarına uyğun gəlmədiyiniz üçün sizə birdəfəlik ödəmə verilməsindən imtina edilmişdir”, yaxud “yoldaşınızın haqqında təhrif olunmuş məlumat vermisiniz” bu  kimi əsassız cavab SMS-ləri göndərməklə kifayətlənir. Bu quruma müraciət edən vətəndaş həqiqətən acdır-toxdur, bu, ölkədə heç kimin vecinə deyil. Ümumiyyətlə, ƏƏSMN bu məsələlərlə məşğul olsa da, nazirliyin doğru-düzgün araşdırma aparmadığı da məlum olur. Çünki dəfələrlə “Hürriyyət”ə müraciət edən şikayətçilərin dediklərində də bu, özünü aydın göstərir.
Şübhə yoxdur ki, Suraxanı rayonu, Yeni Günəşli qəsəbəsində yaşayan Nuranə Əliyevanın müraciətinə verilən cavab heç bir araşdırılma aparılmadan verilib. Nazirliyin cavabına görə, guya, həmin vətəndaş aztəminatlılıq meyarına uyğun gəlmir. Ona görə də birdəfəlik yardımdan imtina edilir. Halbuki, həmin vətəndaş və həyat yoldaşı işsizdir, adlarına heç bir əmlak yoxdur və iki uşaqla çətin durumdadırlar, qohum-əqrabaları onlara dəstək olur.
Nazirliyin heç bir araşdırma aparmadan işsiz və imkansız vətəndaşı 190 manat birdəfəlik ödəmədən məhrum etdiyi azmış kimi, nazirlikdən N.Əliyevaya hansı səbəbdən imtina yazıldığına cavab almaq mümkün deyil. Gah deyirlər adına əmlak var, gah da artıq 2 aydan çoxdur ki, aradşırma aparıldığı vurğulanır.

ƏƏSMN-in mətbuat xidmətinin rəhbəri Fazil Talıblı isə bizə imtina səbəbi ilə bağlı cavab vermək əvəzinə, “O şəxsə iş təklif etmək olar, məşğulluq mərkəzi ilə əlaqə saxlasın”, – deyə “yol göstərdi”. Lakin ona bildirəndə ki, biz vətəndaşa imtina verilməsinin konkret səbəbini aydınlaşdırmaq istəyirik, bu zaman “araşdırıb, cavab verərik”, – deyə bildirdi. Bundan sonra isə, dəfələrlə əlaqə yaratmağa çalışsaq da, ya telefona cavab vermədi, ya da “odboy” verdi.
Maraqlıdır ki, əhalinin sosial problemləri ilə məşğul olan bu nazirlik xalqın ödədiyi vergilərin hesabına fəaliyyət göstərmir ki, Fazil Talıblı özünü bu cür aparır?! Bəlkə xəbərimiz yoxdur, elə bu nazirlik kiminsə şəxsi mülküdür, ona görə də qurumun sözçüsü mətbuat orqanının əməkdaşına da, vətəndaşa da belə sayğısızlıq edir?!  Hansı ki, xalqın sərvəti, ödədiyi vergiləri hesabına formalaşan dövlət büdcəsindən ayrılan vəsaitlə fəaliyyət göstərən bir nazirliyin sözçüsünün nə vətəndaşa, nə də mətbuat orqanın əməkdaşına sayğısızlıq etməyə haqqı çatır.  Yəqin  Fazil Talıblının “Kütləvi informasiya vasitələri haqqında” qanundan xəbəri var. Xəbəri yoxdursa, qanunun 8-ci (Kütləvi informasiya vasitələrinin məlumat almaq hüququ) maddəsinə diqqət yetirsə, yaxşı olar. Həmin maddəyə görə, kütləvi informasiya vasitələri cəmiyyətdəki iqtisadi, siyasi, ictimai və sosial durum haqqında, dövlət orqanlarının, bələdiyyələrin, idarə, müəssisə və təşkilatların, ictimai birliklərin, siyasi partiyaların, vəzifəli şəxslərin fəaliyyəti barədə operativ və doğru-dürüst məlumatlar almaq hüququna malikdirlər. Bu hüquq Azərbaycan Respublikasının qanunvericiliyində göstərilən hallardan başqa, məhdudlaşdırıla bilməz. Çox güman ki, uzun illərdir mətbuatla əlaqədə olan bu şəxs bu barədə də məlumatsız ola bilməz. Sadəcə və sadəcə vətəndaşa və mətbu orqana, eləcə də onun əməkdaşına sayğısızlıq etmək onun kimi “yarım məmurlar”ın vecinə deyil. Çünki ölkədə qanunların işləmədiyini yaxşı bilir və bundan sui-istifadə edir. Lakin, inanırıq ki, bir vaxt gələcək, xalqın sərvəti, ödədiyi vergilər hesabına fəaliyyət göstərən bu nazirlikdə də DTX-nın ötən ay Mədəniyyət Nazirliyində, bir neçə gün öncə isə Xarici İşlər Nazirliyində apardığı analoji əməliyyatın şahidi olacağıq.
Fakt budur ki, dövlətdən sosial yardım almaq haqqı olan çox sayda vətəndaşımız bu gün imkanlı şəxslərə yardım üçün əl açmağa məcbur olur. Doğrudur, bu proqramdan 600 min insanın faydalandığı bildirilir. Amma bu informasiyanın özü də kifayət qədər şübhəlidir. Çünki ətrafımzıda yardım alan insanların sayı deyilənlər tamamilə uydurma olduğunu ortaya çıxarır..
Eyni zamanda bu sualada aydınlıq gətirilməlidir ki, nə qədər vətəndaşa imtina cavabı verilib və niyə verilib? İmtina cavabı verilənlərin həqiqətənmi haqları çatmır və bu vəsaitə ehtiyacları yoxdur? Bunu araşdırmadan “aztəminatlılıq meyarına uyğun gəlmədiyiniz üçün sizə birdəfəlik ödəmə verilməsindən imtina edilmişdir”, – cavabının verilməsi ədalətsizlikdən başqa bir şey deyil.
Şamo EMİN, Hurriyyet.org
P.S. Mövzunu araşdıracağıq.