Bir neçə gün əvvəl Gəncə şəhər Baş Polis İdarəsi tərəfindən keçirilən tender müsabiqəsinin qalibi məlum olub. Yerli media xəbər verir ki, tender müsabiqəsinin qalibi “Sansetka Az Qrup” MMC olub. Müqavilənin şərtlərinə görə, Gəncə şəhər Baş Polis İdarəsi dəftərxana və təsərrüfat mallarının alınması üçün bu şirkətə 73 min 735 manat 60 qəpik ödəyəcək.
Qeyd edək ki, Gəncə şəhər Baş Polis İdarəsi müsabiqə elanını oktyabr ayının 16-da elan edib. 74 min manatlıq tender müsabiqəsinin qalibi olan “Sansetka Az Qrup” MMC isə bu elandan cəmi ay yarım əvvəl – avqust ayının 27-də dövlət qeydiyyatına alınıb.
Mətbuata o da məlum olub ki, avqust ayında “Sansetka Az Qrup” MMC-nin  dövlət qeydiyyatına alındığı ünvanda onlarla şirkət qeydiyyata alınıb. Bu şirkətlərin bir-neçəsinin qanuni təmsilçisi “Sansetka Az Qrup” MMC-nin qanuni təmsilçisi ilə eyni şəxs olub. Belə ki, “Bakı şəhəri Sabunçu rayonu, Zabrat ŞTQ, 2-ci Zabrat dairəsi ev. 133, m. 72” ünvanda dövlət qeydiyyatına alınan “Sansetka Az Qrup” MMC-nin qanuni təmsilçisi Hüseynov Kamran Ayrım oğlu eyni zamanda 5 şirkətin rəhbəri olub.
Bundan başqa, həmin ünvanda qeydə alınan 4 şirkətin rəhbəri Həmidov Ədalət Ələskər oğlu, 4 şirkətin rəhbəri Salmanov Kənan Əhəd oğlu, 4 şirkətin rəhbəri Əlizadə Rəfail Faiq oğlu, 3 şirkətin rəhbəri Mustafayev Ədalət Mahmud oğlu, 3 şirkətin rəhbəri Verdiyev Şahin Zahid oğlu, 3 şirkətin rəhbəri İbrahimov İsmət Allahverdi qızı, 2 şirkətin rəhbəri Məmiyev Anar Məjuəli oğlu, 3 şirkətin rəhbəri Dövlətov Nizamətdin Ələskər oğlu və digərləri olub.
Maraqlısı isə odur ki, eyni ünvanda qeydə alınan bütün şirkətlərin nizamnamə kapitalı cəmi 10 manat təşkil edir. Bu isə belə gümn yaradıb ki, MMC-lərin adlarındakı “az Ltd”, “az Constraksen”, “az Grup” və s. kimi uzantılardan da açıq şəkildə görünür bu şirkətləri bir-birinə bağlayan hansısa “sirli güc” var.
Onu da qeyd edək ki, “Dövlət satınalmaları haqqında” Qanunun 6-cı maddəsində malgöndərənlərin (podratçıların) ixtisasına dair tələblər yer alıb. Həmin maddənin 6.2.1-ci bəndində açıq şəkildə yazılır ki, satınalma müqaviləsinin icrasını təmin etmək üçün müvafiq sahədə peşəkarlığının, təcrübəsinin, texniki və maliyyə imkanlarının, işçi qüvvəsinin, idarəetmə səriştəsinin, etibarlığının olması lazımdır.
Cəmi ay yarım əvvəl yaranan, nəinki rəsmi veb-səhifəyə, hətta sosial şəbəkə hesabına sahib olmayan bir şirkətin hansı peşəkarlığa və təcrübəyə sahib olacağı aydın deyil.
Daha bir maraqlı məqam isə odur ki, 5 gün əvvəl Gəncə şəhər Baş Polis İdarəsi qazanxana və kondisionerlərin təmir işləri və ehtiyyat hissələrinin satın alınması məqəsdilə “Derbı Tıkıntı” MMC ilə müqavilə imzalayıb. Bu şirkət də “Sansetka Az Qrup” MMC ilə eyni gündə – 27.08.2020-ci il tarixində dövlət qeydiyyatına alınıb. Gəncə şəhər Baş Polis İdarəsi ay yarım əvvəl qeydiyyata alınan “Derbı Tıkıntı” MMC-yə 66 min 557 manat 90 qəpik vəsait ödəyəcək.



Daha bir maraqlı məqam…
Bu arada, Daxili İşlər Nazirliyinin “Xəzri” İstirahət və Sağlamlıq Mərkəzi tərəfindən keçirilən tender müsabiqəsinin qalibi ilə bağlı da müəyyən şübhələr ortaya çıxıb. Öncə onu qeyd edək ki, dəyəri 121 min 337 manat 4 qəpik olan tender müsabiqəsinin qalibi “Guven Techizat” MMC olub.
Müqavilənin şərtlərinə görə, “Guven Techizat” MMC Daxili İşlər Nazirliyi “Xəzri” İstirahət və Sağlamlıq Mərkəzi üçün təsərrüfat malları satacaq.
Nizamnamə kapitalı 10 manat olan “Guven Techizat” MMC-nin hüquqi ünvanı Xətai rayonu, Elçin Əliyev, ev 15, m. 5-da yerləşir. MMC-nin qanuni təmsilçisi Xudiyev Pərviz Mətləb oğludur.
Tender müsabiqəsinin maraqlı və qəribə tərəfi odur ki, qalib şirkət  – “Guven Techizat” MMC tender müsabiqəsinin başlamasından sonra dövlət qeydiyyatına alınıb.
“Xəzri” İstirahət və Sağlamlıq Mərkəzi təsərrüfat malları almaq üçün keçirdiyi tender müsabiqəsini oktyabr ayının 27-də elan edib və sənəd qəbulu noyabr ayının 20-də saat 12:00-da başa çatıb. Tender müsabiqəsinin qalibi olan “Guven Techizat” MMC isə noyabr ayının 16-da dövlət qeydiyyatına alınıb. Göründüyü kimi “Guven Techizat” MMC-nin qeydiyyatdan keçdikdən sonra sənədlərini təqdim etmək üçün cəmi 4 gün vaxtı olub.
Çox qəribədir ki, cəmi 4 günlük təcrübəsi olan şirkət 121 min manat dəyərində tenderin qalibi olub. Maraqlıdır ki, cəmi 4 gün əvvəl yaranan şirkət hansı peşəkarlığa və təcrübəyə sahibdir?


141 min manatlıq növbəti şübhəli tender…
Yeri gəlmişkən, Sumqayıt şəhər Polis İdarəsi tərəfindən keçirilən tender müsabiqələrinin qalibləri də məlum olub. Rəsmi məkumata əsasən, ümumi dəyəri 141 min 325 manat 30 qəpik olan tender müsabiqələrinin qalibi  “Afina Building Construction” MMC və “Repair Land” MMC olub.
“Afina Building Construction” MMC Sumqayıt şəhər Polis İdarəsi üçün qazanxana və kondisionerlərin təmir işlərini həyata keçirəcək, “Repair Land” MMC isə idarəyə dəftərxana və təsərrüfat malları satacaq. Bu xidmətlər və mallar üçün Sumqayıt şəhər Polis İdarəsi “Afina Building Construction” MMC-yə 74 min 500 manat 48 qəpik, “Repair Land” MMC-yə isə 66 min 824 manat 82 qəpik ödəyəcək.
Nizamnamı kapitalı 10 manat olan “Afina Building Construction” MMC-nin hüquqi ünvanı Xətai rayonu, Sabit Əliyev, ev 10, m. 3-da yerləşir. MMC-nin qanuni təmsilçisi Quliyev Fərhad Aydın oğludur.
Nizamnamı kapitalı 10 manat olan “Repair Land” MMC-nin hüquqi ünvanı Xətai rayonu, Məhəmməd Hadi, ev 38-da yerləşir. MMC-nin qanuni təmsilçisi Mürsəlov Əbülfəz Qorxmaz oğludur.
Tender müsabiqəsinin maraqlı və qəribə tərəfi odur ki, qalib şirkətlər – həm “Afina Building Construction” MMC, həm də “Repair Land” MMC tender müsabiqəsinin başlamasından sonra dövlət qeydiyyatına alınıblar.
Bildirilir ki, Sumqayıt şəhər Polis İdarəsi qazanxana və kondisionerlərin təmir işlərilə bağlı tender müsabiqəsini oktyabr ayının 22-də elan edib və sənəd qəbulu noyabr ayının 13-də saat 13:00-da başa çatıb. Tender müsabiqəsinin qalibi olan “Afina Building Construction” MMC isə noyabr ayının 12-də dövlət qeydiyyatına alınıb. Məlum məsələdir ki, tender müsabiqəsində iştirak etmək üçün MMC-nin bir gün ərzində zəruri sənədləri toplaması qeyri-mümkündür. Bildiyimiz kimi, MMC-lərin bank hesabı açması bir gün ərzində mümkün deyil. Bunun üçün MMC-lərin əvvəlcə Dövlət Vergilər Xidmətindən “Şəhadətnamə-dublikat” alması lazımdır ki, bu da iki gün ərzində reallaşır.
Sumqayıt şəhər Polis İdarəsi dəftərxana və təsərrüfat malları almaq üçün keçirdiyi tender müsabiqəsini oktyabr ayının 22-də elan edib və sənəd qəbulu noyabr ayının 17-də saat 10:00-da başa çatıb. Tender müsabiqəsinin qalibi olan “Repair Land” MMC isə noyabr ayının 11-də dövlət qeydiyyatına alınıb. Göründüyü kimi “Repair Land” MMC-nin qeydiyyatdan keçdikdən sonra sənədlərini təqdim etmək üçün cəmi 5 gün vaxtı olub. Bu 5 günün 2 günü (13-14 noyabr) şənbə və bazar günlərinə düşdüyü üçün MMC-nin tenderdə iştirak etmək üçün 3 gün vaxtı olub.
Çox qəribədir ki, yenə də cəmi 1-3 günlük təcrübəsi olan şirkətlər 170 min manat dəyərində tenderin qalibi olublar. Odur ki, bird aha bu sualı səlahiyyətli qurumlara ünvanlamalıyıq: cəmi bir gün əvvəl yaranan şirkət hansı peşəkarlığa və təcrübəyə sahib olub?


Məsələ ilə bağlı şirkət rəhbərlərinin və rəsmi qurumların mövqeyini öyrənməyə çalışacağıq. Hələlik isə onu deyə bilərik ki, bu şirkətləri bir-birinə bağlayan hansısa “gizli əl”in olduğu da şübhə doğurmaqdadır.
Hurriyyet.org