Özümü bir neçə saatlıq Frans Kafkanın məşhur “Məhkəmə”sindəki K.Yozef kimi hiss etdim. Heç nə baş verməmişdi. Amma xırda bir hadisə məhkəmələr haqda ümumi bir rəy yaratmaq üçün kifayət edirdi. Rəhmətlik Kafka yaşasaydı və gəlib bircə saat bizim məhkəmələrin istənilən bir iclasında olsaydı 100 il əvvəl yazdığı həmin əsərinə heç bir dəyişiklik etmədən o romanını bu günkü Azərbaycan məhkəmələrinə aid edə bilərdi.
Redaksiyamızın elektron poçtuna, FB səhifəsinə və votsap nömrəsinə hər gün onlarla müraciət daxil olar. Onların böyük əksəriyyəti məhkəmələrin qanunsuz qərarları haqdadır. 
Jurnalist kimi xeyli məhkəmə proseslərində iştirak etmişəm və bunların böyük əksəriyyəti siyasi hadisələrlə bağlı olub. Amma cavabdeh və ya iddiaçı olaraq məhkəmə təcrübəm yoxdur. Qafqaz Müsəlmanları İdarəsi bizi məhkəməyə verdiyi üçün ilk dəfə olaraq cavabdeh kimi Sabunçu Rayon Məhkəməsində belə bir prosesdə iştirak etdim. Saat 10:10-a təyin olunan məhkəmə iclası 50 dəqiqə sonra başladı. Bu müddətdə 4 fərqli iclası müşahidə etdim. İclasların hər biri ortalama 10 dəqiqədən az davam etdi. Həmin iclaslarla bağlı da maraqlı müşahidələrim var. Amma yazının çox uzun olmaması üçün onları saxlayıram.
Hakim Tahirə Əsədovanın sədrliyi ilə keçirilən iclasda qəbul olunan qərar məni həqiqətən də təəccübləndirdi. Məlumat üçün deyim ki, Şeyxülislam “Yeni Sabah”da bu ilin fevral ayında yayılmış informasiyaya görə bizi məhkəməyə verib. Həmin informasiya digər xəbər saytına istinad edildiyindən “Yeni Sabah” KİV haqqında qanunun 62-ci maddəsinə görə heç bir məsuliyyət daşımır. Mən bunu hakimin diqqətinə çatdırdım və T. Əsədova dediyimin həqiqət olub-olmadığını yoxladı. 
Lakin bu zaman Şeyxin vəkili spikuliyasiya edərək həmin xəbərin istinad edildiyi “RegionNews.az” saytının KİV olmadığı haqda fətva verdi. O  iddia etdi ki, KİV haqqında qanunda guya nəzərdə tutulub ki, “KİV” yalnız hüquqi şəxs olmalıdır. “RegionNews.az” isə hüquqi şəxs olmadığından, dövlət qeydiyyatından keçmədiyindən KİV deyil və “Yeni Sabah” KİV-ə istinad etməyib.
Yorğun və proseslərdən bezikmiş kimi görünən hakim isə bunu doğru yoxsa yalan olmasını yoxlamadı. Qanunda belə bir tələb varmı, yoxmu, maraqlanmadı. Sadəcə şeyxin nümayəndəsinin bu fətvasına qanunun tələbi kimi yanaşdı. Hakimin peşəkar və ya qeyri-peşəkar olması haqda heç bir iddiam yoxdur. Sadəcə görünən o idi ki, qanunsuz qərar qəbul etmək üçün çox həvəslidir. Bu işi sadəcə başından etmək istəyirdi. Miskin bir mənzərə idi. Hakim cavabdehdən xahiş edir ki, iddiada göstərilən tələbləri qəbul etsin, məsələ uzanmasın. Axı hakim qanunun aliliyini qorumaq üçündür, kimisə razı salmaq, incitməmək, könlünü xoş etmək üçün deyil. 
Azərbaycanın məhkəmə sisteminin acınacaqlı durumda olması haqda onillərdir yazılır. Təssüf ki, ölkədə bütün sahələrdə gedən yenilənmə prosesi hələ də məhkəmə sisteminə transfer edilməyib. Məhkəmələr dövlətin sütunudur. Qanunun aliliyini arayan adamların son sığınacağıdır. Görünən isə budur ki, biz hələ də bu bataqlıqda çabalamaqdayıq.