İxtisas və ali məktəb seçimində təhsil haqqı bəzən həlledici rol oynayır. Təhsil haqqına görə hər il bir qism abituriyent müabiqədən keçsə də, ali təhsildən kənarda qalır. 
Təhsil eksperti Kamran Əsədov Yenisabah.az-a Azərbaycanda təhsil haqqının reallığı əks etdirmədiyini bildirib:
“Azərbaycanda ali təhsil müəssisələrindəki təhsil haqları kifayət qədər yüksəkdir. Buna təsir edən əsas amillərdən biri ali təhsil müəssisələrinin xərcləri ilə bağlıdır. Bu gün Azərbaycanın 51 ali təhsil müəssisəsində 182 min tələbə təhsil alır. Ödənişli əsaslarla olan eyni ixtisas üzrə müxtəlif təhsil haqları formalaşıb. Təhsil haqlarına təsir göstərən amil ali təhsil müəssisəsinin bir tələbə üçün çəkdiyi xərclərdir. Üstəlik müəllimə verilən əməkhaqqı, kommunal xərclər də buna əlavə edilməlidir. Eyni zamanda ali təhsil müəssisəsinin laboratoriyası, elektron kitabxanası, digər lazımi avadanlıqları varsa, bunların hər biri üçün mütəmadi xərclər çəkilir”.
Ekspertin fikrincə, təhsil haqları birmənalı şəkildə azaldılmalıdr:
“Mövcud təhsil haqları əksər vətəndaşlar üçün əlçatan deyil. Azərbycanda ali təhsil haqlarını müəyyən qədər azaldılmalıdır ki, hər kəs üçün əlçatan olsun. 
Hər il təxminən 1000-1500 nəfər abituriyent təhsil haqqını ödəyə bilmədiyinə görə ali təhsildən imtina edir. Bu amilin aradan qaldırılması üçün birmənalı şəkildə təhsil haqlarını ən azı 50 faiz azaltmalıyıq. Çünki ali təhsil müəssisələri pandemiya dövründə o qədər də xərcə düşməyiblər”.