Azəbaycan Respublikasında 90 günlük qeydiyyatla müvəqqəti və daimi yaşayan,100-ə yaxın Gürcüstan əsilli soydaşlarmız  vaksinasiya ilə bağlı yarnmış problemin həll edilməsi üçün 
"SOYDAŞ" İctimai Birliyinə müraciət ünvanlayıblar.
Birliyin sədri Kamran Ramazanlı bu problemləri ictimailəşdirmək və aidiyyəti dövlət qurumlarına çatdırmaq üçün Azərbaycan Respublikasının Milli Məclisinin deputatı, Azərbaycan - Gürcüstan parlamentlərarası işçi qrupunun rəhbəri Arzu Nağıyevə müraciət edib.Müraciətdə deyilir:
Nəzərinizə çatdırmaq istəyirik ki, Azərbaycanda müvəqqəti yaşayan Gürcüstan əsilli soydaşlarımızın peyvəndləmə prosesi yalnız Sumqayıt şəhəri 2 saylı poliklinikada aparılır. 
Bakı şəhərində yerləşən Semaşko adlanan xəstəxanasında isə yalnız 1,2 və 5 illik qeydiyyatı olanlara peyvənd vurulurdu ki, hal-hazırda bu xəstəxana da yalnız koronaya yoluxan xəstələrin müalicəsi üçün ayrılıb. 
Bilirsiniz ki, Azərbaycanda yaşayan Gürcüstan əsilli soydaşlarımızın böyük çoxluğu ölkəmizdə 90 günlük qeydiyyatla yaşayırlar və onların qeydiyyat müddəti bitdikdə pandemiyaya uyğun olaraq qeydiyyat vaxtları uzadılır. 
Qeyri - rəsmi məlumatlara görə, Azərbaycan Respublikasında 100 minə yaxın belə daimi və müvəqqəti qeydiyyatla yaşayan Gürcüstan vətəndaşları vardır. Soydaşlarımızın əksəriyyəti Bakı, Sumqayıt və Gəncə şəhərlərində və digər rayonlarda yaşayırlar. 
Belə olan təqdirdə 90 günlük qeydiyyatı olan soydaşlarımız vaksinasiya olunmaq üçün ciddi problemlərlə qarşılaşırlar. Hesab edirəm ki, bu məsələ Milli Məclis səviyyəsində gündəlikdə müzakirə olunarsa, aidiyyatı dövlət qurumları, problemlərin aradan qaldırılması üçün müvafiq qərarlar verə bilərlər.
 Problemdən ən yaxşı çıxış yolu isə onların qeydiyyatda olduqları ərazidə yerləşən poliklinikalarda vaksinasiya olunmaları olardı. Və yaxud da adı çəkilən şəhərlərimizdə peyvənd olunma məntəqələrinin sayı artırıla bilər. 
Soydaşlarımızın böyük əksəriyyətinin burada işlədiyi, ailələrilə birlikdə yaşadıqlarını nəzərə alsaq, vaksin olunmayan şəxslərin gələcəkdə işlə təmin olunmasındakı problemə də nəzər yetirməliyik. 
Sizdən xahiş edərdik ki, soydaşlarımızın üzləşdiyi bu problemlərlə bağlı aidiyatı qurumlara müraciət edəsiniz, problemin həllində bizə dəstək olasınız.

Hörmətlə, 
Kamran Ramazanlı
“Soydaş” İctimai Birliyi İdarə Heyətinin sədri