Ramazan ayında gün günə calanır. Bu ayda toy, şənlik qadağası olmasa da, şadlıq evləri və restoranlar da "Vağzalı" səslənmir.

Sozcu.unfo-nun məsələ ilə bağlı sorğuladığı bir neçə şadlıq sarayı bu iddianı təsdiqləyir.
“Neptun” şadlıq sarayının baş inzibatçısı Zakir Məmmədov bu ayda toy sifarişlərini qəbul etmədiklərini söyləyib:
“İllərdir ki, bu işlə məşğulam. Hər il Ramazan ayının ənənəsini qoruyub saxlayırıq. Müştəriləri də digər aylara yönləndiririk. Doğrudur, dində Ramazanda toy qadağan olunmayıb. Müştərilərə deyirik ki, bu ay sifariş qəbul olunmur. Narazılıq bildirən də olmayıb, insanlar anlayır”.
“Kolizey” şadlıq sarayından isə bildirilib ki, toyda iştirak edəcək qonaqların sayı az olduğuna görə sifariş qəbul olunmur:
“Ramazan ayında toy etmək günah deyil. Sadəcə sırf içkilərə, təamlara görə qonaqların əksəriyyəti toyda iştirak etmir. Bir-iki sifariş gəlib, o da saraya sərf etmir. Çünki toyda iştirak edəcək şəxslərin sayı azdır”.
“İnci” şadlıq sarayından bildirilib ki, müraciət edənlər olsa belə, toy iftardan sonra olmalıdır:
“Bu ayda toy etmək üçün müraciət edən olmayıb. Sifariş gəlsə belə, qəbul etmərik. İnanmırıq ki, iftardan öncə kimsə toya razılıq versin”.
“Çıraq” şadlıq sarayından isə əksinə, müraciət olarsa, sifarişin qəbul ediləcəyi bildirilib.