Ermənistanın sabiq prezidenti, Xocalı hərbi canisi Robert Köçəryan Azərbaycanı yeni müharibə ilə hədələyib. “Qarabağda ədalətsiz sülh gec-tez yeni müharibəyə səbəb olacaq” deyib. Sitat: “Əgər tərəflərdən biri müharibənin nəticəsi ilə razılaşmırsa, onda yeni müharibə gözləyin. Bu o vaxt baş verəcək ki, daha əlverişli geosiyasi şərtlər və digər səbəblər olacaq. Siyasi həll yolu tapılmalıdır. Əgər Azərbaycanda Qarabağ problemini həll etdiklərini düşünürlərsə, bunun əksi olacaq – hazırkı ən yaxşı mövqelərinə baxmayaraq” – Köçəryan sayıqlayıb.
O, həmçinin ermənilər üçün rüsvayçı 10 noyabr sənədini ATƏT-in Minsk Qrupunun yox, hökumətin uğursuzluğu sayıb: “Minsk Qrupu hazırda lazımdır. O, Rusiyaya da lazımdır. Qarabağın statusu barədə danışıqların hansı istiqamətdə gedəcəyini demək çətindir. Dünya təcrübəsi göstərir ki, həddən artıq ədalətsiz sülh uzun müddət davam etmir”. Yəni ki, müharibə labüd ola bilər. Azərbaycanın öz ərazi bütövlüyünü güc yolu ilə bərpa eləməsi sən demə, böyük ədalətsizlik imiş! Bununla o, həm də dolayısıyla 10 noyabr üçtərəfli anlaşmanı sabotaj edib. Bu irqçi-faşistin son sərsəmləmələrini, müharibə və revanşsit ritorikası nədən xəbər verir?
BMT Xankəndinə qayıdan ermənilərin sayı ilə bağlı Rusiyanı təkzib edib. Belə ki, təşkilatın Qaçqınlar Agentliyi qaçqın və məcburi köçkünlərlə bağlı yeni statistika dərc edib. Statistikaya əsasən, 2021-ci il yanvarın 26-a olan bilgilərə görə, Ermənistandan Qarabağa Rusiya Müdafiə Nazirliyinin açıqladığından iki dəfə az - 24993 erməni qayıdıb. Müvafiq sənəd BMT QA-nin saytında yayımlanıb. Rusiya sülhməramlı kontingentinin məlumatına görə isə, söhbət 47.792 qaçqından gedir. Bu da BMT-nin açıqladığı rəqəmdən təxminən iki dəfə çoxdur.
Qeyd edək ki, qayıdanların sayı ətrafında əvvəllər də mübahisələr yaranıb. Ehtimallara görə, Rusiya rəqəmi şişirtməklə müəyyən geosiyasi məqsədlər güdür. Rəqəmlərdəki fərqin səbəbləri nədir?
Prezident İlham Əliyev Pakistanla birgə hərbi təlimlər keçirməyin vaxtı çatdığını söyləyib. Bunu o, srağagün Pakistann Birləşmiş Qərargah Rəisləri Komitəsinin sədri general Nadim Razanın başçılıq etdiyi nümayəndə heyətini videoformatda qəbul edən zaman söyləyib. Dost və qardaş Pakistanla ortaq təlimlər Azərbaycana döyüş bacarığımızın artırılması baxımından nə verə bilər?
Bu gün YAP qurultay çağırıb, özünü yenidən dizayn edir. YAP-ın yeniləşməsi Azərbaycan siyasətinə hansı yeniliyi gətirəcək? Azərbaycanın müxalif çizgili, yaxud müstəqil sayılan 6 partiyası hakim partiyaya qoşulmaqla bağlı bəyanat verdi. Azərbaycan Demokratik Sahibkarlar Partiyası, sədri Qasım Qasımov, Azərbaycan Kəndli Partiyası sədri Məmməd Məmmədov, Azərbaycan Xalq Demokratik Partiyası, sədri Rafiq Turabxan,Azərbaycan Yurddaş Partiyası, sədri Gülay Quliyeva (əvvəlki sədr Mais Səfəri bir neçə ay öncə koronadan dünyasını dəyişib), Milli Qurtuluş Partiyası, sədri Vüqar Oruc.
Rafiq Turabxan deyib ki, ölkədə 3-4 partiya olsın, ancaq güclülər qalsın. O, başqa partiyalara da YAP-a birləşməklə bağlı müraciət edəcəyini bildirib. Bəs digər partiyalar bu barədə nə düşünür? Turabxanın çağırışına qoşulub YAP-a birləşərlərmi?
Korona gündəmi: 1. Novruz bayramı günlərində rayonlara gediş-gəliş məsələsi necə olacaq, məhdudiyyət qoyulmayacaq ki? Sərnişin avtobusları işləyəcəkmi? Gediş-gəliş nəticəsində doğrudanmı yoluxma sayı xeyli arta bilər, yoxsa artıq əhalinin böyük hissəsi yoluxub qurtarıb və qəti qorxusu yoxdur?
Bu və gündəmdəki digər mövzular  "Canlı debat"da aparıcı Sevinc Telmanqızının və efirə canlı telefon bağlantısı ilə qoşulacaq ekspertlərin təqdimatında təhlil edilir. Müzakirəyə tamaşaçılarımız da qoşula bilər. Bunun üçün Musavat.com-un Facebook və Youtube səhifələrindən birini bəyənib, paylaşa bilərsiniz.
Facebook səhifəsinin ünvanı:
https://www.facebook.com/NewMusavat/

Youtube səhifəsinin ünvanı:
https://www.youtube.com/user/TVmusavat