Azərbaycanın iqtisadi gündəmində bir nömrəli məsələ son həftələr ölkədə ərzaq məhsullarının qiymətində bahalaşmanın müşahidə olunmasıdır. Bunu deputat Əli Məsimli də parlamentin plenar iclasındakı çıxışında təsdiqləyib.
Onun sözlərinə görə bu, insanların maddi durumuna çox ciddi təsir edir və narazılıq yaradır: “Odur ki, süni qiymət artımına, bahalaşmaya, inhisarçılığığa qarşı ciddi ölçülər götürülməlidir”.
Bəs süni qiymət artımını yaradan qüvvələr kimlərdir? Bayramqabağı bahalaşmanın qarşısını necə almaq olar?
İqtisadi sektorda ikinci mühüm Azərbaycan-Türkiyə qarşılıqlı ticarət əlaqələrində yeni mərhələnin başlanğıcı olan “Preferensial (seçim) ticarət sazişi”nin imzalanmasıdır.
Bu isə o deməkdir ki, malların hərəkətində gömrük tariflərinin azaldılması və ya ləğvi, ya da buna bənzər imkanlar yaradılacaq. Bu məsələ Ermənistanın, Rusiya və İranın diqqətini də cəlb etməmiş deyil. Bəs saziş Azərbaycanda türk mallarının ucuzlaşmasına səbəb olacaqmı?
İqtisadi siyasətdə ən əhəmiyyətli açıqlama Prezident İlham Əliyevdən gəldi. Dövlət başçısı YAP-ın qurultayındakı çıxışında Avropa İttifaqı ilə assosiativ sazişin nə üçün imzalanmadığına aydınlıq gətirdi.
Onun sözlərinə görə, “Şərq tərəfdaşlığı” ölkələrindən heç biri Avropa İttifaqına üzv olan 9 ölkə ilə strateji tərəfdaşlıq haqqında sənəd imzalamayıb, sadəcə, təlimat kitabçasıdır, göstərişlər verilir, Azərbaycan isə bundan imtina edib, Avropa İttifaqı ilə bərabərhüquqlu saziş üzərində işləyirik və sazişin 90 faizi razılaşdırılıb, pandemiya işləri yubadıb. Rəsmi Bakı postpandemiya dövründə sazişi imzalaya bilərmi? Aİ ilə saziş Rusiya ilə əlaqələrimizə mənfi təsir göstərəcəkmi?
"TV Musavat"ın efirində saat 12:00-da canlı yayımlanan “Həftə içi” proqramının qonağı olan REAL Partiyasının icraçı katibi, iqtisadçı-ekspert Natiq Cəfərli bu məsələləri dəyərləndirir.
Həmçinin partiya sədri İlqar Məmmədovun YAP-ın qurultayı haqda söylədikləri, partiya üzvü, deputat Erkin Qədirlinin YAP-çı deputatları təbrik etməsi müzakirə mövzusudur.
Verilişi aşağıdakı linklər vasitəsilə izləyə bilərsiniz.
Facebook səhifəsinin ünvanı:
https://www.facebook.com/NewMusavat/
Youtube səhifəsinin ünvanı:
https://www.youtube.com/user/TVmusavat