“Apreldən əsgərlərin tərxisi başlayacaq” - Onlara MAXE əməkhaqqı ödənilməlidirmi?

"Oğlum 2019-cu ilin iyul ayında hərbi xidmətə çağırılıb. Dövlət Sərhəd Xidmətinin əsgəridir. Yanvarda 1 il 6 aylıq xidmət müddəti başa çatıb. Amma hələ də tərxis edilməyib. Ondan 3 ay əvvəlki çağırışçılar da ehtiyata buraxılmayıb. Apreldə iki illəri tamam olacaq. Bilmirik, xidmət müddəti nə zaman bitəcək, bu barədə informasiya ala bilmirik".
Bu sözləri "AzPolitika.info"-nun əməkdaşı ilə söhbətində Gəncə sakini Mehman Rüstəmov bildirib. Onun sözlərinə görə, qeyri-müəyyənlik onu və əsgərlikdə olan övladını narahat edir: "Bir söz desinlər, qərar versinlər, bilək. Müharibə dayanıb, hərbi vəziyyət yoxdur, uşaqların nə qədər hərbi xidmətdə olacaqlarını bilmirik".
Qeyd edək ki, Azərbaycan Silahlı Qüvvələrinin digər qoşun növlərində xidmət edən əsgərlər də hələ ki, ehtiyata buraxılmayıblar.
Ötən il sentyabrın 27-də Azərbaycanla Ermənistan arasında başlayan müharibəyə xüsusi təyinatlı qüvvələrlə yanaşı həmin dövrdə xidmət keçən hərbi qulluqçular da cəlb olunub. Sentyabrın 28-dən etibarən müharibə ilə bağlı ölkədə hərbi vəziyyət elan olunub, komendant saatı tətbiq edilib. 10 noyabrda Rusiya prezidenti Vladimir Putinin vasitəçiliyi ilə Azərbaycanla Ermənistan arasında atəşkəs razılaşması imzalanıb.
Parlamentin dekabrın 11-də keçirilən iclasında Prezident İlham Əliyevin "Hərbi vəziyyətin ləğv olunması haqqında" fərmanının təsdiq edilməsinə baxılıb və hərbi vəziyyət ləğv edilib.
Qanunvericiliyə uyğun olaraq, Prezidentin fərmanı ilə 18 yaşına çatmış vətəndaşların, habelə xidmət keçməmiş şəxslərin silahlı qüvvələrə çağırışı ənənəvi qaydada davam etdirilib. 2020-ci ilin oktyabr, 2021-ci ilin yanvar aylarında fərman icra olunsa da, hərbi xidmət müddəti bitmiş hərbi qulluqçuların ehtiyata buraxılması həyata keçirilməyib.
"Hərbi vəzifə və hərbi xidmət haqqında" Qanunun 38-ci maddəsinə görə, müddətli həqiqi hərbi xidmət hərbi qulluqçuları - ali təhsili olanlar – 1 il, qalan bütün əsgərlər, matroslar və çavuşlar – 1 il 6 ay xidmət etməlidir.
Hazırda onların xidmət müddəti qanunda göstərildiyindən 6 aya yaxın artıqdır. Bu məsələ necə tənzimlənməlidir? Müqavilə ilə Silahlı Qüvvələrdə xidmət edən müddətdən artıq hərbi qulluqçuların maaşları onlara da ödənilməlidirmi?
Hərbi jurnalist Rey Kərimoğlu bildirib ki, hazırda sözügedən hərbi qulluqçulara əsgər maaşı verilir. "Hələlik belədir, başqa məlumat yoxdur. Sonrası necə olacaq, heç kim bilmir", - deyə o vurğulayıb.
Hərbi ekspert Ədalət Verdiyev "AzPolitika.info"-ya bildirib ki, aprel ayının 1-dən etibarən oktyabrda xidmət müddəti başa çatmış hərbi qulluqçuların tərxis olunmasına başlanacaq: "Doğrudur, onlar iki il hərbi xidmətdə oldular. Yanvar və aprel ayında ordu sıralarına çağırılan hərbi qulluqçuların ehtiyata buraxılması isə, çox güman, iyul ayında gerçəkləşdiriləcək. Onlara xidmət etdikləri müddətdə məvaciblər onsuz da ödənilir. Söhbət müddətli hərbi qulluqçuların maaşından gedir. Bu barədə qanunvericilikdə dəyişiklik olarsa, onlara müddətdən artıq xidmət edən hərbi qulluqçuların maaşlarının verilməsi məqsədəuyğun olardı. Çünki onların xidmət etdikləri 1.6 il başa çatıb. Ölkədə hərbi vəziyyət rejimi yoxdursa, qanunvericiliyi dəyişməklə onlara daha üstün maaş ödəyə bilərlər. Hələlik qanunvercilikdə belə tənzimləmə nəzərdə tutulmayıb".


Oxşar Xəbərlər

Xəbər lenti


{sape_links}{sape_article}