“Bu gün Ermənistan Azərbaycana qarşı yeni təbliğat-informasiya müharibəsi aparmağa cəhd edir. Bu məqsədlə ermənilər və onların havadarları bir çox xarici ölkələrin qanunverici orqanlarında, habelə Avropa Parlamentində, ATƏT-in Parlament Assambleyasında, AŞPA-da ölkəmizə qarşı böhtan kampaniyaları təşkil edirlər. Halbuki bu beynəlxalq qurumlar hal-hazırda erməni millətçi-faşistlərinin ən azından son otuz ildə azərbaycanlılara qarşı törətdikləri qətliamlara və digər vəhşiliklərə görə, eləcə də Ermənistanın 44 günlük Vətən müharibəsi dövründə törətdiyi ağır hərbi cinayətlərə görə ən qısa zamanda beynəlxalq məhkəmə qarşısında cavab verməsini təmin etmək üçün müvafiq tədbirlər görməlidirlər.”
Bu sözləri yap.org.az saytına verdiyi açıqlamasında Azərbaycan Respublikası Milli Məclisinin deputatı Kamaləddin Qafarov deyib. Millət vəkili, ilk növbədə, Qarabağda yaşayan ermənilərə qarşı hər hansı bir təhdidin olmasına dair iddiaların tam əsassız olduğunu qeyd edib: “Azərbaycanın necə sülhsevər və tolerant bir ölkə olduğu bütün dünyaya məlumdur. Əsrlər boyu ölkəmizdə ən müxtəlif xalqların, millətlərin nümayəndələri, müxtəlif dinlərin təmsilçiləri mehriban şəraitdə, tolerantlıq mühitində yaşayıblar.
Bu gün də həmin ənənə davam edir və hətta daha geniş şəkildə öz təzahürünü tapır. Amma indi bizi başqa bir milləti təhdid etməkdə günahlandırırlar. Həm də bunu kimlər edir? Monoetnik Ermənistan ideoloqları. Əlbəttə, Ölkə Prezidenti cənab İlham Əliyevin də öz çıxışılarından birində qeyd etdyii kimi, azərbaycanlıların və ermənilərin gələcəkdə necə qarşılıqlı əlaqədə olacağını proqnozlaşdırmaq çətindir. İşğaldan azad edilmiş ərazilərə qayıdacaq keçmiş qaçqınlar ermənilərin onların torpaqlarına, əzizlərinin qəbirlərinə, dini abidələrinə nə etdiklərini görəcəklər. Onlar nə hiss edəcəklərini proqnozlaşdırmaq elə də çətin deyil. Lakin Azərbaycan gələcəyə istiqamətlənən bir dövlətdir. Ölkə Prezidenti cənab İlham Əliyev də öz çıxışlarında dəfələrlə bəyan edib ki, əgər Ermənistan bizə müsbət işarələr versə, biz yeni əlaqələri qura bilmək üçün hər şeyi edərik. Amma Ermənistanın hazırkı mövqeyi tamam başqa niyyətlərdən xəbər verir. Azərbaycanofobiya, türkofobiya, revanşist şüarlar Ermənistan cəmiyyətini normal düşünmək və qərar vermək imkanlarından məhrum edir.
Bu, əlbəttə, Ermənistanın öz problemidir. Erməni əhalisinin Azərbaycanda yaşamasının qeyri-mümkünlüyünü iddia edən ünsürlərə gəlincə isə, onlar bilməlidirlər ki, Azərbaycan heç kəsi öz iradəsinin əksinə olaraq bu ölkədə yaşamağa məcbur etmək niyyətində deyil. Əgər kimsə Azərbaycanda yaşamağı özü üçün qeyri-mümkün heab edirsə, istənilən an ölkəni arzu etdiyi istiqamətdə tərk edə bilər. Yeri gəlmişkən, İkinci Qarabağ müharibəsinin yenidən qabarıq formada üzə çıxardığı məqamlardan biri də Azərbaycanın həqiqətən tolerant və multikultural bir ölkəyə çevrilməsi faktıdır. Azərbaycan burada yaşayan bütün xalqların doğma Vətənidir və çoxmillətli ölkədir. Məhz bu səbəbdən də Vətən müharibəsi zamanı bütün etnik qruplardan olan insanlar son damla qanlarınadək tək düşmənə qarşı vuruşublar.”
Kamaləddin Qafarov Azərbaycanın ermənilərə qarşı təcavüz həyata keçirməsini tamamilə yersiz bir iddia adlandıraraq bunları deyib: “Azərbaycan erməni təxribatlarına son qoymaq, öz torpaqlarını işğaldan azad etmək və BMT Qətnamələrinin icrasını təmin etmək məqsədilə qısa müddətli müharibə apardı, hərbi əməliyyatlar keçirdi və öz məqsədlərinə nail oldu. Xalqımıza qarşı qanlı cinayətlər törətmiş işğalçı Ermənistan ordusu döyüş meydanında məhv edildi. Burada hansı təcavüzdən danışmaq olar? Bir də Azərbaycanın bu məqsədlə guya ki, qardaş Türkiyədən və ya digər ölkələrdən əsgəri dəstək alması barədə iddialar, ümumiyyətlə, gülüncdür. Azərbaycan Ordusu istər kəmiyyət, istər keyfiyyət, istərsə də mənəviyyat baxımından işğalçı erməni ordusunu qat-qat üstələyirsə, bizim əlavə qüvvəyə niyə ehtiyacımız olmalıdır? Bir məqamı da qeyd etməliyəm ki, başqa ölkənin ərazisinə soxulmuş silahlı birləşmələrin onlara qarşı təcavüz həyata keçirildiyinə dair bəyanatlar verməsi heç bir məntiqə sığmır.”
Kamaləddin Qafarov Azərbaycanın Vətən müharibəsini beynəlxalq humanitar hüququn bütün normalarını gözləməklə, insanlıq əleyhinə heç bir cinayətə yol vermədən apardığını qeyd edib. Millət vəkili bu xüsusda erməni təbliğatının öz hərbi birləşmələrinin cinayətlərini Azərbaycanın adına çıxarmağa çalışdığını deyib: “Ali Baş Komandan cənab İlham Əliyevin rəhbərliyi ilə Azərbaycan təmkinli şəkildə müharibə apardı. Qarşı tərəfin mülki infrastrukturuna zərər və mülki vətəndaşlar arasında itki minimal səviyyədə oldu. Azərbaycan Prezidenti müharibənin hərbi fazasını Şuşadakı Qələbəmizdən sonra dayandırmaqla dərin strateji baxış nümayiş etdirdi. Müharibə zamanı tətbiq edilən taktika, əslində, illər boyu aparılmış danışıqların, ilkin razılaşmaların, 2009-cu ildə razılaşdırılmış baza prinsipləri ilə uzlaşır. Ermənistandan fərqli olaraq Azərbaycan müharibə dövründə də məsuliyyətli ölkə kimi davranıb. Müharibə zamanı hərbi qulluqçularımız tərəfindən bir nəfər belə olsun mülki vətəndaşlara zərər yetirilmədi. Ermənistan tərəfində mülki əhali arasında 40 nəfərdən az tələfatın olması bunun açıq sübutudur. Amma bizim cəbhə bölgəsindən xeyli uzaqda olan şəhərlərimizi, gecə evlərində yatan dinc sakinləri hədəfə alan, raket atəşinə tutan Ermənistanın insanlıq əleyhinə törətdiyi cinayətlərə görə mütləq cavab verməlidir.”
Kamaləddin Qafarov bu məqamı da xüsusi olaraq qeyd edib ki, ermənilər tərəfindən atılmış mülki vətəndaşlara qarşı Azərbaycan hərbçilərinin sərgilədikləri münasibət də dövlətimizin humanist siyasətinin və ordumuzun humanist davranışının təzahürüdür: “Azərbaycanın müharibə zamanı davranışı müxtəlif beynəlxalq qurumlara Ermənistan tərəfindən tamamilə təhrif olunmuş formada təqdim edilir. Ermənistan Azərbaycana qarşı demonizasiya siyasəti yürüdərək, beynəlxalq ictimaiyyətə uydurmalar qəbul etdirməyə, azərbaycanlıları düşmən, Azərbaycanın isə sanki Ermənistanı və Qarabağı işğal edən ölkə olaraq təqdim etməyə çalışır.
Lakin Azərbaycan təkcə müharibə zamanı deyil, müharibədən sonrada da eyni insani davranış nümayiş etdirib. Azərbaycan 1500-dən çox erməni əsgərinin cəsədini Ermənistana təhvil verib. Azərbaycan Rusiya sülhməramlıları ilə birlikdə axtarış əməliyyatlarında iştirak edir. Halbuki hələ Birinci Qarabağ müharibəsində bizim 4 min hərbçimiz itkin düşüb və bir cəsəd belə bizə qaytarılmayıb. Budur aramızda olan fərq!”
Sonda millət vəkili Qarabağda və ətraf rayonlarda erməni mədəni irsinin dağıdılması barədə səslənən iddialara da münasibət bildirərək bunları demişdir: “Nəyinsə dağıdılması üçün ilk növbədə onun mövcud olması gərəkdir. Tarixi saxta olan bir etnosun hansı mədəni irsindın danışmaq olar? Amma ermənilər işğal altında olan ərazilərimizdə yüzlərlə tarixi-dini abidəmizi məhv etməklə dədə-baba torpaqlarımızdan həm tarixi keçmişimizi, həm də mənəvi yaddaşımızı silmək istəyiblər. Ermənistan tərəfindən Azərbaycanın işğal altındakı torpaqlarında dini və tarixi-mədəni abidələrin məhv və talan edilməsi əslində bütün bəşər sivilizasiyasına qarşı törədilən beynəlxalq cinayətdir. Erməni vandalları işğal etdikləri ərazilərimizdəki yeraltı və yerüstü sərvətləri talamaqla yanaşı, maddi mədəniyyət nümunələrini də yox ediblər. Bu mümkün olmadıqda isə həmin abidələrin üzərində erməni dilində yazılar həkk edib, yaxud həmin abidələrin onlara məxsus olması barədə erməni dilində lövhələr yerləşdiriblər.
Uzun illər boyunca xalqımızın bu torpaqlarda qurub-yaratdığı evlər, muzeylər, məscidlər, tarixi-mədəni abidələrimiz ermənilər tərəfindən dağıdılıb, viran qoyulub, talan edilib. Əlbəttə, Azərbaycan azad edilmiş rayonlarda tezliklə bütün tarixi-mədəni abidələri bərpa edəcək. Lakin bu gün ermənipərəst qüvvələrin təhriki ilə Azərbaycana qarşı irəli sürülən uydurma ittihamlar ətrafında müzakirələr aparan beynəlxalq qurumlar bilməlidirlər ki, Qarabağ və ətraf rayonlarda tarixi-mədəni və dini abidələrin dağıdılmasında Ermənistanla yanaşı onlar da məsuliyyət daşıyırlar. Çünki, işğal olunmuş ərazilərimizdə və tarixi Azərbaycan torpaqları olan Ermənistan ərazisində xalqımıza məxsus maddi-mədəni irsin məhv edilməsi siyasəti yalnız Azərbaycan xalqına qarşı deyil, bütün insanlığa qarşı törədilən vəhşilikdir və bu vəhşiliyi susqunluqla izləməyin özü də bir cinayətdir.”